Ell'America

Brevs ord l'America 
«Na, na, anora mass'ju per de biè bétga plé!»                               pdfFlyer
Historia dall'emigraziun tuatschina

CuviartaAmericaDenter 1850 e 1930 han 300 persunas bandunau la Val Tujetsch ed anflau ina existenza els Stadis Uni dall'America. Pils biars ei l'emigraziun stada la suletta pusseivladad da mitschar dalla pupira economica. Per auters eis ei stau in'aventura che ha motivau d'ughegiar e riscar enzatgei auter. Als pli biars eis ei reussiu.
La historia dall'emigraziun da Tujetsch ei era representativa per las ulteriuras vischnauncas dalla Cadi.
El center dil cudisch stattan las brevs dils emigrants e cun quei era las persunas che han scret ellas. Il cudisch descriva il destin da numerusas persunas singulas e da famiglias dalla Val Tujetsch.
El raquenta da farmers, da cava-aur e d'aventurists. Aschia dil Giachen Martin Hendry, dil Giachen Martin Muggli e da sia sora Josefina, dil Giachen Antoni Pally, dil Gion Fidel Muggli e da sia feglia Catrina Baer-Muggli, dils Derungs, dil Plazi Hendry, dallas soras Deplaz, dil Martin e dalla Margreta Werth e dils Monn's Tiuters ed aunc d'entgins auters.

Cuntegn dall'emprema part      pdfAmerica 1a part
In plaid sin via
Tujetsch
Emigraziun
Ils Tuatschins van egl jester
Igl emigrar ell'America
Nua ein ils Tuatschins secasai?
La nova patria
Las brevs
Ils emigrants e lur brevs
Pader Lucas Caveng SJ 1847
Giachen Martin Hendry, emigraus 1852
Giachen Martin e Maria Giuseppa Muggli, emigrai 1854
Gion Benedetg Deragisch e famiglia, emigraus 1860
Vigeli, Martin e Giachen A. Pally, emigrai 1853 e 1870
Il Badus american
Gion Fidel Muggli e feglia Catrina Baer-Muggli, emigrai 1872
Vigeli Giusep Beer, emigraus 1872
Ils Derungs, emigrai 1879/1880/1882
Giachen Francestg Berther, emigraus 1880
Cuntegn dalla secunda part      pdfAmerica 2a part
Aluis Berther, emigraus 1893
Rosa Martina Jacomet e Duri Giusep Monn, il Pepi, emigrai 1903, 1906
Plazi Hendry emigraus 1909
Las soras Margreta e Marta Deplaz, emigradas 1912, 1914
Anna Maria Jacomet, emigrada 1920
Martin e Margreta Werth, emigrai 1921
Tumaisch Beer, emigraus 1921
Sep Antoni Gamboni, emigraus 1903 e 1923
Gion Battesta Monn e siu fegl Franz, emigrai 1923
Ils Tiuters – ina famiglia d'emigrants, emigrai 1906–1923
Paul Valier, emigraus 1927
Ils emigrants tuatschins ell'America – ina survesta
Patratgs finals
Epilog ed engraziament
Annexas
Survestas
Survesta dils emigrants
Diember d'emigrants tenor ils onns (1850–1930)
Diember d'emigrants tenor las schlatteinas
Diember d'emigrants tenor las persunas
Diember d'emigrants tenor umens, dunnas ed affons
Diember dils emigrants tenor ils vitgs ed uclauns
Survesta dallas brevs
Gliesta davart il furniu ed engulau igl onn 1799
Fontaunas
Litteratura e fontaunas
Brevs e fotografias
Derivonza dallas brevs
Derivonza dallas fotografias, documents, cartas e tabellas
Mesiras
Mesiras americanas
Registers
Register da nums geografics
Register da nums da persunas
pdfEmigraziun americana tuatschina, entir cudisch

Impressiuns dalla vernissascha dil cudisch, ils 15 d'avrel 2011.
AUnbenannt Scannen 05  AUnbenannt Scannen 06

AUnbenannt Scannen 07  AUnbenannt Scannen 09

Ella pressa

pdfEmigraziun La Quotidiana
pdfEmigraziun La Quotidiana
pdfEmigraziun La Tuatschina
El Radio Romontsch
mp3Temps da stad - temps da viadi - Emprema emissiun d'Adolf Collenberg - Emigraziun ell'America
mp3Temps da stad - temps da viadi - Secunda emissiun d'Adolf Collenberg - Emigraziun ell'America
mp3L'emigraziun ell'America, emissiun d'Esther Berther ella Marella dil RR (1-8-2010)
mp3 Emissiun sur dall'emigraziun ell'America d'Augustin Maissen, Radioscola 1966
pdfText en Radioscola 1966 Emigraziun romontscha americana
mp3Rapportaschas ord l'America, d'Augustin Maissen - Emigrants Tujetschins
Empustaziun dil cudisch
Stizun


Amplificaziuns novas tiel cudisch "Emigraziun ell'America"
Davart il:
Soliva Paul Giusep
(1855–1922) da Gonda, fegl da Giachen Antoni Soliva, fravi, (1823–1864) e Maria Dumenia Valier (1824–1902). El ei emigraus 1893 ed arrivaus ils 23 da fevrer 1893 a New York naven da Le Havre cun il bastiment La Normandie. Returnaus e morts igl onn 1922 el spital a Glion.  pdfAmerica 2a part pagina 877.
Notizia ord lavur da Battesta Soliva: Il Paul seresvolva dad ira ell'America cun in per auters vischins da Sedrun. Cul Paul ei iu bein leuen. In um luvrus e spargnus, sco el era, ha gleiti giu ensemen empau daners en quels buns onns sco l' America veva lura. Cheu ha el survegniu tentaments ed ha maridau ina biala femna che ha gleiti giu marendau vi ses daners, schau enzinar ora ed ida per siu fatg. Aschia ha il Paul stuiu semetter en danovamein a gudignar. El ei staus sauns ed en zacons onns ha el saviu turnar a Sedrun e viver ruasseivlamein cun sia sora. Domisdus ein morts dalla daguota ualti in suenter l'auter ed han schau anavos in pulit fatg per ils artavels.


Davart il:
Monn Duri Giusep (Ulrich Joseph)
(1883–1972) da Sedrun, «Pepi Madleiner» , la tatta veva num Madleina Bearth e l'entira descendenza ha survegniu il surnum «Madleiners» . El ei il fegl da Giusep Anton Monn, Madleiner, (1848– ) e Glänzinger Ursula (1854–1885). Emigraus 1906, returnaus 1912, maridau ils 16 da mars 1913 Rosa Martina Jacomet (1882–1964) e turnaus anen ensemen culla dunna igl onn 1913 ed arrivaus leu ils 11 d'avrel 1913, partenza da Le Havre cul bastiment France. El ei segiramein aunc staus duas gadas sin viseta en Tujetsch, quei igl onn 1920 e lu 1954. Dapli mira pdfAmerica 2a part pagina 457.
Notizia ord lavur da Battesta Soliva: Per saver nutrir la famiglia ha la vieua Madleina era stuiu tarmetter treis da ses buobs giul Schuob sco quei era la sort dils biars en Tujetsch da quei temps. Il Gion Antoni che fuva il vegl da quels ei suenter enzacons onns turnaus a Sedrun e staus il sustegn dalla famiglia. Il Duri Battesta ed il Sep Antoni ein restai en Tiaratudestga per sia veta.
Il Gion Antoni, il grond Madleiner sco el vegneva numnaus, ei adina staus cun la tatta e buca maridaus, ha denton tratg si in buob da siu frar Sep Antoni che veva tarmess en dil Schuob. Quei ei stau in buob cun temparement, in ver Schuob che ha caschunau bein enqual dagretta agl aug ed alla tatta, schegie ch'el era absolut buca schliats. El ha maridau la Rosa Jacomet ed ein seretratgs ell'America, nua ch'el viva aunc oz (1957) e stat bein.


Davart il:
Monn Placi (1899–1979) da Sedrun e numnaus il «Placi Plum», fegl da Vigeli Sigisbert Monn (1857–1906) e Maria Ludivina Beer (1866–1952). Arrivaus ils 26 da fevrer 1923 a New York. Partenza naven da Cherbourg Frontscha sil bastiment Pittsburgh. Serendius a Hornell. Tenor la dumbraziun dil pievel da 1930 eis el maridaus cun ina Tudestga, Ida H. (1904–1988) e siu mistregn vegn indicaus ella dumbraziun sco electricist. Mira pdfAmerica 2a part paginas 745/748 ed 870.

Brev da 1945
Il tgau porta:
PlaciMonnPL. MONN  
MOTOR and REFRIGERATION SERVICE
44 Scott Street  Phone 417-J  Hornell, N.Y.

Hornell, ils 30 da november 1945
Hello Robert e famiglia!
Haiel retschiert tia brev che has scret ils 23 da november. Vesel era che Albert ei staus leu. Haiel tarmess la Tia adressa a Carl Lehmann, sche el vul vegnir leu, sa el scriver a Ti. Vesel era che la Tia mumma plai ei buca memia bia che Ti vulesses vegnir en cheu. Jeu vegnel a dir, l'America ei in bien plaz da viver. In pauper um ha adina fortuna sch'el vul luvrar, mo daners creschan buca sin la strada. Jeu haiel cheu fetg bia, sche fuss staus leu havessel nuot. Il frar Albert e jeu vegnan buca ora fetg bein. Cura che el ha daners, sche eis el in grond um ed enconuscha buca mei, mo eis el en miseria lura Plazi ei schon buns. Il fegl da Albert ei in bien giuven. Jeu stundel en mia casa ed el sa star leu. Haiel mia casa sezza dapi igl 1929. Vegnel a star pli modern en casa la primavera che vegn. Quei vegn a custar a nus 1500 dollars. Haiel cumprau in plaz tier in lag per las mias feglias. Haiel era cumprau 8 juhartas da farma, mo haiel neginas "tgesas" sin leu. Tegnel quei sche ti vulas luvrar quei cura che ti vegnas cheu. La mia dunna vegn schon a gidar sche ti fas bien. Ella ha tema che ti fas sco il frar Albert. Jeu haiel speronza che ti fas bien. Vegnel a trametter ils pupials en ina jamna, forsa sas vegnir gleiti. Jeu saiel buca co ei stat cun la transportaziun sur l'aua. Quei stos ti anflar ora tez.
Jeu saiel buca pertgei Josefina e Sebastian scrivan buca? Mo emporta nuot. La tatta ha scret a mi. Havessel schon plascher sche havess in fotografia da tia famiglia. Las mias feglias van a scola e studegian fetg bein. Nus havein l'emprema neiv il di vargau; ei fa fetg freid cheu, mo nus havein buna cotgla ed ina buna "Dampfheizung" en casa. Nus vegnin buca a haver freid en casa.
Forsa sas vegnir avon la primavera. Igl ei meglier d'ira sin l'aua igl unveirn. Spargna in tec daners che ti sas pagar empau dil viadi. Jeu paghel da vegnir sil "schif" en cheu, mo ti sas forsa pagar la viafier entochen tier la mar. Da leu vegnel jeu a tarmetter las "tichets" tochen New York, da leu paghel la viafier. Ei drova d'ira cun la viafier tochen Hornell. Jeu tegnel che la viafier cuosta buca memia bia d'ira entochen Cherbourg en Frontscha. Ti sas dir a mi con igl ei. Ti stos mo prender vestgadira, igl auter sas cumprar cheu pli meglier. La tia rauba sas vender avon che ti vegnas. Venda buca entochen che ti has tut dretg da vegnir. Sas anflar ora a Basel tier ina firma che venda "tichets" d'ira en la America. Quels san dir quei che cuosta. Ti sas vegnir 3 classa sur l'aua, quei ei buca aschi mal.
Siarel la brev.
Cordials salids
P. Monn e famiglia



Brev da Tumaisch Beer/Behr
(cudisch pagina 701)
CuviartaTumBehr1954
St. Paul, 1954
Mes cars parents, cumar Maria e cumpar Sigisbert,
Hai grad puspei legiu atras Vossa cara brev, che hai buca daditg retschiert, per la quala jeu engraziel a Vus cordialmein. En special ha ei allegrau mei fetg de leger che la cara Sofia seigi ussa en cumpleina sanadad. Sin nossa viseta igl onn 1947 veseva la cara Sofia ora aschi tresta e deprimida, che la cara Bertha ha bargiu ord cumpassiun. Dieus benedeschi Ella e sia famiglia.
Sco ins auda ha ei dau massas neiv leu en las alps. In bruoder dalla claustra da Mustér ha scret dad 1 1/2 meter altezia, quei ei bein prigulus da lavinas en nossas vals.
Sundel savens en enguoscha da udir schliatas novas - disgrazias da lavinas. Vegli il car Diu pertgirar da tuttas disgrazias.
Nus havein giu in lev unviern aschilunsch, aunc mai grondas ferdaglias e mo ina buna quarta neiv cuviera la tiara ed ei drova mo paucs dis da bun'aura e la neiv ei svanida.
Enzacu il zercladur ni fenadur visetel lu puspei Tiu figliel bruoder Gotfrey-Paul (mira). El ei sauns e sia lavur ei il perver e haver quitau da 3000 gaglinas, las qualas sesanflan en treis gronds gagliners. Els han empau trubel cun grondas siarps tussegadas, che rumpan en els gagliners e mazzan gaglinas e maglian ils ovs. - Perquei ha siu superiur armau El cun ina pistola, sinaquei ch'El sappi sittar en cass da basegns.
Avon paucs dis hai scret ad El ina liunga brev e sia risposta vegn lu per suenter Pastgas. El sa scriver a casa mo quater gadas ad onn.
E nus tscheu, mes affons e famiglia, nus essan tuts sauns e la Maria, nossa feglia ha cun 42 onns puspei giu ina poppa ch'ei ussa gleiti in onn veglia, pia en tut 20 beadis e gleiti 78 onns vegls.
Il Thomas, junior, studegia cheu en in seminari per giuvenils che vulan vegnir missiunaris e sia sora Johanna va era en claustra, igl atun proxim - pia la veglia da Diu daventi.
E nossa obligaziun ei da far ferventamein oraziun per els.
Treis da nos vischins, in Tony Schmidt, fegl dil Wigieli Schmidt, quels stevan en casa nua che Emanuel Deragisch stat. Siu bab e Sep Antoni e Luis Bearth ein emigrai en America igl onn 1888. Jeu mavel il tierz onn a scola.
Ils auters dus ein signur Linder da Brienz e signur Steiner dil cantun Sviz. Jeu vegnel ad entruidar il Tony Schmidt tier Vus en cass ch'el vegn a Sedrun. El tschontscha perfin aunc pulit il romontsch.
Mes cars, jeu hai giu grondas tentaziuns d'era far il viadi cun els, mo mia feglia Anna e tut ils auters affons han temiu, muort mia vegliadetgna. Ed igl ei schon ver, sundel gleiti denter ils pli vegls da Tujetsch.
Mardis vargau, ils 8 da quest, havein finiu la devoziun da 40 uras cheu en nossa farria. Ei stau dis da perfetga adoraziun, oraziun e da grazias retschartas da nies car Diu. Essend che nossa baselgia ei bia memia pintga e la populaziun che crescha ad in crescher - ei quella gronda devoziun vegnida celebrada el gimnasium da nossa nova casa da scola, che ha plaz per 5 - 600 persunas.
En dus onns vegn la presenta baselgia scarpada giu ed ina nova vegn baghegiada sil medem sulom, ei veramein grond basegns.
Cheu suondan enzacontas lingias en eglisch dalla figliola Anna: My dear Jak. Martin



Mes Cars, sundel segirs ch'enzatgi dils hosps leu el hotel Cruna ni Oberalp san translatar a Vus quels paucs plaids che l'Anna ha scret.
Salidei Vos fargliuns tuts cordialmein, sco era tut ils cars vischins da Gonda. Pia, tenor Vossa brev, vegn ei baghegiau ina casa da scola per ils pigns leu damaneivel da Vus. Quei ei veramein progress.
A, gie, avon che emblidel - Hai era retschiert la carta che havevas tarmess cun il Sep Monn Peppy. Els ein sauns ed il Sep va bia sin la pesca.
L'Onna Maria Caduff-Jacomet ha giu in accident. Ei selischnada e curdada sin via da glatsch e fatg mal il dies. Ha stuiu star en spital per in per dis, mo ei puspei a casa sin via da semegliurar. Vias da glatscha, quei ei ina calamitad mintg'onn cheu ell'America:
Grad ussa creschan las auas aschi fetg, muort la bun'aura da primavera che bia marcaus, vitgs e farmas giu el sid vegnan innundai. La glieud ston bandunar las habitaziuns ed en bia loghens ston ins duvrar barcas per ir per ils vitgs entuorn e bia glieud piardan la veta cun negar. Cheu a St. Paul ei negin prighel, essend cheu aults crests.
Ussa hai scret da bia. Salids era a mes nevs a Surrein, sco era al Maurus, dil qual jeu spetgel schon daditg sin novas. A Dieni ei negin pli da mia glieud - veramein, co ei sa semidar sin il mund. Aunc specials salids alla Maria Ursula e famiglia.
Pia concludel cun ils pli cordials salids

Vies adina sincer parent ed amitg
Tumaisch Behr

Per buca trametter a Vus sapzi vit - aunc specials salids a mias duas cusrinas Onna Maria e Benedicta Huonder. - Jeu vegni en cuort a scriver ina brev alla cara Onna Maria. Quella cara e sontga olma, che ha flaghegiau la paupra Onna Maria Derungs cun tonta pazienzia.
Nus treis cusrins havein schau leger duas sontgas messas solemnas cheu per la cara defuncta.
Ella ruaussi en paisch.
R. I. P.


Brev da Florentin Monn (Tiuter) a Vigeli Valier da Camischolas
ValierV
St. Paul, ils 1-2-1971
Car amitg e famiglia!
In cordial engraziament per Tia biala brev dils 5 da schaner 1971. Ei fa in detg grond plascher da saver che vus essas aunc en ualti buna sanadad en Vos onns vegls, quei ei in grond scazi sin quest mund. Nus savein era dir il medem, havein giu in fetg sanadeivel e bien onn, era mes dus frars tscheu ein en buna sanadad.
Il Flurin ha aber piars sia cara dunna Maria Monn-Riedi en vegliadetgna da 75 onns. Ella era buca stada en buna sanadad ils davos onns, ei morta ils 22 d'uost 1970 (dultsch cor da Jesus dai a sia olma il ruaus perpeten). Igl Alois e sia dunna Barbra ein aunc en buna sanadad e laian Vus salidar.
Haveis era marveglias dils frars Deragisch; quels ein aunc domisdus en ualti buna sanadad per sias vegliadetgnas. Ein maridai, il Fidel (1900–1982) ha duas feglias maridadas e han sias famiglias. El ha aber giu fetg grondas disgrazias en ses onns vegls. Sia emprema dunna ei morta igl onn 1958 tras ina gronda operaziun. El ei puspei maridaus circa dus onns suenter, haveva puspei ina fetg buna dunna. Igl onn 1968 ein els stai en ina disgrazia d'automobil. Ella ha survegniu in "schlac", ei "peralaisa" dad in maun giu, stuiu ira en in spital, sa buca ira ed era buca tschintschar aschiditg sco ella viva, siu cor ei aunc fetg ferms e quei ei tut ch'ella ha. Quei ei fetg trest. Il Giusep (1901–1980) ha in buob e duas buobas, era tuts maridai; els ein ussa era puspei persuls e va cun els fetg bein.
Il Segner ha era clamau a  casa nossa cara amitga Anna Maria Caduff-Jacomet. Suenter ina fetg leva malsogna e fetg paucas dolurs ha ella stuiu murir ils 15 d'avrel 1970 en vegliadetgna da 81 onns, sia olma "rastir" e paisch. Quei ein ussa zacontas novitads.
Havein giu ina ualti migeivla stad, buca bia calira, havein ussa aber ualti bia neiv ed era fetg freid. Viel ussa calar cun miu malscriver, speronza che capeschies in tec. Era in grond engraziament per la Gasetta Romontscha, endrieschel fetg bia novitads da leu entras quella.
Pia per quella ga ils pli cordials salids da nus tuts, vies amitg

Florentin e famiglia

Dear

Ellen


Brev da Florentin Monn (Tiuter) a Norbert Berther, Camischolas

FLM01  FLM02
St. Paul, ils 14-12-1971
Stimau signur Berther,
Havein retschiert Vossa brev dils 8-6-1971. Sco hai capiu vulesses Vus ina fotografia d'ina colonia ni in liug cul num Badus el stadi Ohio. Haiel fatg tut pusseivel d'anflar quei plaz, haiel aber giu negin success, jeu stun fetg mal, che saiel buca gidar Vus da quei temps.
Cordials salids, Vies patriot
Florentin Monn


Brev da Placi Fry
St. Paul, ils 23 da fevrer 1908
Car frar, jeu hai retschiert tia brev cun plascher, mo vid il scriver sto ei esser daventau pauc leu en 18 onns. Nus essan dapresent tuts sauns ed adina lavur detgavunda. Dacuort ha miu buob grond giu ina operaziun, mo ussa eis el meglier. Tschun visetan la scola ed ils dus pigns ein a casa. Tscheu ha fatg uonn in fetg lev unviern, aunc ussa giu pauca neiv e buca fetg freid. Dil Martin Peder saiel jeu dar paucas bunas novas. Lez lavura grad ussa, mo plitost tut unviern per la spisa. In cumpogn da pauca vaglia, senza caracter u instrucziun; Sch'ei dat mo da quels leu, sche da quels sch'ei leu, tscheu san ei buca duvrar da quella glieud. Jeu haiel tschintschau zuar mo ina gada cun el, mo haiel spert viu tgei um igl ei.
Il marcau da S. Paul ei gronds, aber sentupein bein enqual gadas el marcau ensemen cun romontschs. La pli part dils Romontschs ein ora d'entuorn quasi sin tuts mauns.
Quest unviern haiel jeu il Berther. La stad quentel jeu far cun mes buobs. Jeu haiel era udiu ch'il Sep Maria Schmed da Tschamut ed il Gion Battesta Geronimi da Selva vegnien a semetter sin vaidi ils 2 da mars per far ina viseta leu. Jeu vi era haver agurau in ventireivel bein niev onn.
Novitads saiel jeu neginas ch'interessassen Tei. Perquei concludel jeu mia brev cun in bi salid
Tiu frar
Placi Fry


Historia da Tujetsch sa era fascinar Tei!

0270
CuviartaAmerica

Historia dall’emigraziun tuatschina ell’America: Na, na, anora mass ju per de biè bétga plé. - cumpariu 2011 pdfAmerica

mp3AmericaTujetschL'emigraziun ell'America", emissiun d'Esther Berther ella Marella dil RR. Emissiun da Radioscola 1966 sur dall'emigraziun americana dad A.Maissen

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

historia-back-03.jpg