Gion Felci Monn
Gion Felici Monn, Camischolas (1867 – 1954)
Translaziuns da dramas e cumedias:
| – | Igl aunghel dalla paisch – Drama da P. Maurus Carnot. Per romontsch da Gion Felici Monn – 1928 |
| – | La mort dil bandit – Drama en treis acts da Carli Fry – Carnet screts a maun – 1930 |
| – | La mort della Garda svizzera – Drama – Quater carnets |
| – | Ina ierta – Cumedia en treis acts – Translatau da Monn Johann – Carnet – 1899 |
| – | La smaledicziun dil bab – Drama – Translatau Monn Gion Felici – Treis carnets – 1945 |
| – | Gl’assistent dil miedi – Cumedia en dus acts – En romontsch da Monn Gion Felici – In carnet |
| – | Oz a mi damaun a Ti – Cumedia en dus acts – Translatau da Monn Johann – In carnet – 1898 |
| – | Il zenn miraculus – Drama en treis acts da Gugl. Kamerer – Translatau da Monn Johann – 1898 |
| – | Constantinus il giuven herox cristian – Drama en quater acts da Francesco Paglia – Per romontsch da Monn Gion Felici – Dus carnets – 1950 |
| – | Igl aunghel dalla paisch – Drama en tschun acts da P. Maurus Carnot – Per romontsch da Gion Felici Monn – Carnet A4 screts cun maschina 86 paginas / trsl. 1928 |
| – | La smaledicziun dil bab – Drama en treis acts da Richard Bertram – Translatau da Gion Felici Monn – Carnet A4 screts cun maschina 40 paginas |
| – | La mort da Garcia Moreno Drama historic en tschun acts – Translatau da Gion Felici Monn – 5 carnets A4 screts cun maschina – 1901 |
Gion Felici Monn 1876-1954
Gion Felici Monn ei naschius ils sedisch da mars 1876 a Zarcuns; ni ils paders da Mustér ni ses mussaders a Sviz ein vegni a sté da perschuader il studetgel. Vegnir prèr ei iu al Gion Felici cuntercor; il bab perencunter ei insistius ed el ei turnaus a casa ed ha fatg il pur, si’entira veta. En sia sinceradad ha el è concediu da ver fatg vess. La scola da recrut ha la finala purtau agli in tec variaziun e Gion Felici ha fatg la scola da caporal. Sco fatgs ch’el fuva da star davontier, han ins scochemai proponiu el per litinent. Il bab a Zarcuns ha cunterdetg agli per in’autra ga. E Gion Felici Monn ha stuiu ceder.
Cun ventgatschun onns ei Gion Felici Monn semess en cun sia spusa Maria Nescha Cavegn a Camischolas. Da ses tschun affons ein dus morts da pign, il sulet buob, il Luis, veva gia diesch onns. Cuort sissu ha la consorta Maria Nescha stuiu prender cumiau da quest mund; il mariu ei sefidaus d’enzatgi. La vieua Onna Maria Riedi da Rueras ha detg da gie; els ein semaridai e sias treis feglias han giu ina mumma e l’Onna Maria sezza ei aunc daventada mumma da dus agens affons.
La sort a casa ha buca dumignau il Gion Felici Monn da volver il dies als fatgs publics. Bunamein il cuntrari, sco cassier communal e gerau ha el gudignau giu las cordas ed ei sinquei enina vegnius parsura dalla vischnaunca. Buca meins che duas ga ha Gion Felici Monn fatg president communal, en tut quitordisch onns, da quei tschentaner il pli ditg da tuts insumma. Il cumin dalla Cadi ha fatg el derschader cirquital e deputau – per differents biennis.
E duront quell’activitad politica ein dallas caussas succedidas. Sidavon stattan la lavur ed il quitau da stabilir ina communicaziun neu dad Ursera e da sutensi, si da Glion. Per ina regiun da siu persei sco Tujetsch ein las viasfier stadas d’impurtonza. Ella val sezza ha la meglieraziun dallas alps ed ils aquaducts dau in bien ton. Siu meret per igl implont electric da Tujetsch ei gronds e sco parsura ha Gion Felici Monn fatg ina liunga experienza.
Il consum liber ei staus in da ses ulteriurs intschess; ils protocols ella nudauna ein enzatgei da num. Sco carstgaun d’enconuschientschas ha el giu interess divers. Gion Felici Monn ei staus buns per la fundaziun dalla scola secundara a Camischolas dils anno 1908. Per la scolaziun digl anim e dil spert ha el ora ed ora giu in bien ton danvonz. E medemamein per l’educaziun fisica; ch’ins patratgi oravontut dil club da skiunzs e da sia promoziun cuntinuada pil turissem.
Enzatgi veva giu detg ch’il Gion Felici Monn laschi anavos „mo empau“ cudischs e scartiras. Buca mo, mobein era! Dapi da daditg enneu, dapi da student, eis el seprius en pil romontsch, sin via ed enten far cusseida, dapertutanavon. Il vocabulari da Ramun Vieli e la prosa da Sep Mudest Nay han mussau agli ina buna via. Da translatar Jeremias Gotthelf e differents teaters, sco per semeglia „Igl aunghel dalla pasch“ e „Garcia Moreno“ ei Gion Felici Monn semussaus ora. Onns ora ha el fatg il regissur e tut tgi ch’ei staus datier ed ha tedlau – lez ha saviu emprender.
Monn-Decurtins, Felici. Indicaziuns dils 5 d’uost 1984 (Cudisch da Tujetsch)