Ir pil sontg Ieli

Ed il Gambun va aunc adina per il sontg Ieli
Ed il Gambun va aunc adina per il sontg Ieli
da Vic Hendry, Schaffusa/Sedrun, Calender Romontsch 1997, pagina 360

Na, il num Gambun ei en nies cass buca disfiguraus, mobein sulettamein midaus en romontsch, essend che la terminaziun dalla schlatteina Gamboni suera dil talian. E buca senza raschun han ins semplamein detg Gambun e stgavo. Ton che era jeu setegnel vidlunder.
Ils Gambuns (Gamboni) derivan dad Augio en la Val Calanca, ozildi ei la pintga cuminonza Augio integrada alla vischnaunca da Rossa. Apropos. Ina secunda lingia dils Gambuns ei sefatga en Tumliasca, a Tumegl; la schlatteina sescriva Gambon — ed ha aschia in colorit aleman. Quella genealogia che sesanfla els mauns da colonel Christian Gambon (1919) da Tumegl/Friburg indichecha negliu il svilup dils Gambuns (Gamboni) a Pardomat-Dado ed era buca quel en Tujetsch.
Di, tgi enconuscha buca il Gambun da tschereschas da pader Baseli Berther (ord la broschura: Sin Cadruvi, 1904)? El, il Gambun, ei staus in um vegl cun caultschas cuortas ed ina cassacca blaua che ha giu si dies ina trucca cotschna en fuorma da turnister ed in canaster en bratsch. Per tschun raps ha el dau in pugn plein tschereschas dultschas als «buézs». Mo l’indicaziun dallas tschereschas dultschas e dil bien cor dil Gambun ein per dabia buca tut. Plitost quei che suonda aunc. Dapi che enzatgi seregorda ein ils Gambuns stai ils pots dil sontg leli atras l’entira Surselva. Ed igl ei stau ina procura honoreivla da rabitschar en ina cofra quadra e nera ils treis sogns Ielis, numnadamein:
Igl leli per il batten
Igl Ieli per la creisma
Igl Ieli per ils moribunds da Glion entochen a Sedrun.
Igl ei fetg probabel che pader Baseli Berther plaida en siu raquent dil Giusep Antoni Gamboni (1829-1896). El ei igl emprem Gamboni ch’ei screts en ella statistica dalla Val Tujetsch. Naven da lu tocca sil di dad oz ein 97 (navontasiat) persunas cun la schlatteina Gamboni naschidas e registradas en la val.
San ins maneivlamein s’imaginar. Il bab da Giusep Antoni, il Fidel Antoni Mudest Gamboni (1802-1871) ch’ei semaridaus cun Maria Catrina Schmedt (1798-1857) – ella ei stada in bien ton pli veglia ch’el sez – vegn ad esser vegnius en la Val Tujetsch sco fumegl u pastur e cun

Giusep Antoni Gamboni (1829-1896)

pauchet en sac. Ed el ei semess en a Sedrun, en casa gronda sur baselgia, ual oragiusut il Cadruvi. El che ei staus screts el register da Sumvitg (oriunds da Pardomat Dado, ina fracziun da Cumpadials. A Pardomat Dado sesanfla aunc oz ina casa pintga e veglia ch’ils vischins numnan la casa dils Gambuns (Giulia Monn-Foppa) che stat sezza a Pardomat Dado. La casa ei decadenta e porta il numer blau dalla casa cun la cefra 269; siu il quader sut il tetgal stattan ils bustabs MAC (il C ei buca da leger schi claramein – savess eventualmein esser in G sespiars. Perencunter igl orsal 1802 ei fetg legibels. Priu il cass ch’il bustab grond davostier fuss in G, savess la casa esser dedicada da Christian Giusep Gamboni e da sia consorta Margareta Decurtins (ils orsals dils dus consorts ein buca enconuschents) a lur fegl Fidel Anton Mudest Gamboni ch’ei naschius igl onn 1802.
Igl ei stau igl onn 1885; quei fallescha buc. Cunquei ch’il bab Giusep Antoni Gamboni (1829-1896) ei maina turnaus si dil Schuob – ed ei fuva neras uras dad ir per il sontg (pressapauc ina jamna avon gievgia sontga) ha ei tuccau al fegl Sep Fidel (1866-1945) da prender ina decisiun. Quei ei igl emprem da metter vitier. Ils vischins ed il farrer Francestg Eduard Muoth vevan giu confidau al Giusep Antoni ina missiun, numnadamein dad ir cun ina partida Schuobachechlers giun Baviera, mattatschs e mattatschas ch’el ha giu da metter sut. Cumpatg ch’el veva giu bien e ditg da plazzar. Tonca il fegl Sep Fidel ei semess en siala, el cun ses scheniv onns che era struschamein vargaus ils cunfins ed insumma mai staus giu Cuera. Enten trottar atras il marcau da Cuera, eis el per schabetg daus encunter siu bab. Mo gliez schi beinvegnius fuvi siu bab aunc maina staus ad el, uss duront il mument dalla gronda fatalitad. Ed il bab ha priu risguard ed ha mussau agli il casti digl uestg, la catedrala e las ulteriuras caussas necessarias. La ceremonia en baselgia e la benedicziun dil sontg Ieli han fatg al Sep Fidel ina impressiun cuzzeivla.

Giusep Fidel Gamboni 1866-1945

Duront l’entira cuorsa a cavagl eis el staus cunscients dalla rihezia ch’el veva cun el en siala.
A Glion ha igl um dil sontg Ieli entschiet a partgir ora siu scazi. Ils spirituals dalla Lumnezia e quels dalla Foppa ein vegni ed han retschiert cun reverenza ils sogns Ielis per las pleivs – las caplanias. E silsuenter ei il Sep Fidel Gamboni sefermaus a Tavanasa per distribuir als logs da Danis, Dardin e Breil. A Trun ed a Sumvitg ha el turnau a tener eri – ils plevons e lur caplons ein vegni encunter. Tuts cun profund respect enviers la repartiziun. Ed el arriva per tard el vitg da Mustér, lu bein empau stettis. L’entira cuorsa a cavagl veva tuttina cuzzau ton sco ina jamna entira. Ed el s’entarda auncallura ina brava uriala en la vischnaunca da Mustér – per semetter finalmein sia via encunter Tujetsch.
Epi – san ins bein avunda, ina interpresa semeglionta va pil solit nuota senza incaps giud il scav. Inaga u l’autra sa il cavagl ballistrar, ni che schiglioc enzatgi vegn els peis. Ina sentupada ha Sep Fidel tuttavia teniu bein endamen.
Igl ei stau in da quels avrels apartis e l’aura veva fatg ora ed ora striegn. Bletsch e freid e brentina senza calar.
Sep Fidel Gamboni dat en da Valzeinza encunter la Val Franzosa. Si da Reinsut tila in vent satel agli en fatscha. Sco unglas sgrefla la neiv ferdalenta e renta vid la detta. A per cun la neiv arrivan ils schems orasi dalla Val Franzosa. Schuldada sturnida e ruclada en tgaubrochels giu pils rovens.
Matei ch’el ha mo quitau dad udir ils schems, aschia persuls enamiez la stgiraglia. Quei sa capitar. Igl um sin il cavagl less far in bien meini. Enaquella vesa el a vegnend encunter in utschac stermentus. Sto esser ch’il cavagl ha era fatg stem; el aulza in per gadas ils calzers davon. Il monster ner sco la notg vegn pli e pli datier.
Suenter esser ius cun il maun sur il frunt – setegn igl um a cavagl vid la trucca dil sontg Ieli. Pongir, il sontg Ieli ei aposta per tgi ch’ei en prighel. Ed en ina stat igl glimari sidretg avon il cavagl. Sep Fidel tscharna per la letga il profil dalla fatscha. Igl ei negin auter ch’il hermer bergamasc ch’ei sco el s’entardaus sin via. La trucca si dies e la capiala lada veva fatg ordad el in utschac da sgarschur.
Il hermer veva temiu sco el.
Els mo ual salidan l’in l’auter e dattan omisdus il tgau. Il stgir dalla notg veva gnanc fatg stem.
Suenter ver adempliu tschunconta onns il niebel uffeci da ir per il sontg Ieli a Cuera, surdat Sep Fidel Gamboni la missiun a siu fegl Giachen Giusep, il sulet descendent masculin. Ils dus ulteriurs fegls ein stai morts da pign.
E cun ses gleiti siatont’onns mira il Sep Fidel aunc inaga anavos. Siu bab Giusep Antoni vegn agli datier. Sco per exempel lezza sentupada a Cuera, mond el per l’emprema gada pil sontg Ieli. Ed atgnamein ha el, il Sep Fidel, tratg in tec ord schlatteina. El ei staus plitost da paucs plaids e retratgs. Tonca el ha giu ton sco nuot dil humor schetg da siu hab che ha saviu dar veta ad in’entira raspada empau eria cun ina detga sturnidada. Mo gliez ina ch’ins siglievi tut agradsi. Remarcabel s’ei Iu schon magari – co las caussas s’artan. E quella sturnidada anetga ei semantenida pulitamein en certas famiglias dalla schlatteina Gamboni.
Da l’autra vart tucca ei da metter vitier. Il Sep Fidel Gamboni ei buca mo staus in um hofli e cun risguard, el ei staus ina persuna spargnusa ed inschignusa che ha pinau l’iseglia ed ils uaffens ch’ils auters han fatg empaglia.
Ferton ch’igl ei stau ils onns nauschs da miez ils anno trenta. Cura che il Giachen Giusep Gamboni (1904-1971) ei semess la mesjamna dalla Jamna sontga sin via a Cuera per il sontg Ieli. El ei ins cun il tren; il Sep Fidel perencunter era aunc ius ils davos onns in toc silmeins, cun la menadira. E siu cavagl alv s’udeva cun el, sco mo in cavagl sa s’udir cun il vitturin.
Jeu sai buca cavigliar exactamein il num dalla Nella, jeu manegel, cun tgi il num ha s’udiu, cun

Giachen Giusep Gamboni (1904-1971

tgei cavagl. Mo Nella ei restau fermamein el tgau.
Pader Baseli Berther ha mess giu la pretensiun. Ch’in dils antenats Gambun hagi giu maridau ina Nell da Sogn Pieder neu dall’Austria. Ed jeu sedamondel: S’ei forsa tuttina enzanua cheu in scav? Ualvess che la sora da Sep Fidel, la Maria Catrina Elisabet (1864-1902) seigi dada en il scavaz da sturnidar. Ella ei ida bien e baul en claustra ad Ingenbohl, leu nua ch’ella ha priu il num Zaccaria. Quei num ha en mintga cass fatg ina stoda impressiun, essend che duas persunas dalla descedenza han num quelluisa.
Tonca il fegl Giachen Giusep Gamboni (1904-1971) ha maniau la mesjamna sontga tier sia sora Margareta Maissen-Gamboni (1902) a Cuera. El ei dapi lu adina staus in um dalla messa marveglia. E quei per cass è a Cuera. Naven dalla damaun allas tschun entochen allas nov eis el mintg’onn staus en la catedrala. Empau da liungas funcziuns, forsa schizun per il Giachen Giusep ch’ei adina staus stedis el survetsch divin.
La distribuziun sco tala serepeta; dil tren anora partga il Giachen Giusep Gamboni ora il sontg Ieli e quei a Glion, a Tavanasa ed a Trun. Il tschancun naven da Trun entochen a Sumvitg eis el adina ius a pei, matei pervia dalla schliata communicaziun dil tren. A Rabius ha il Giachen Giusep era entupau igl augsegner da Surrein. Ed igl ei stau da secapir e natural ch’ils spirituals han mintgamai spitgau il Gambun alla staziun. E la surdada dil sontg Ieli ei stada pleina da stema e respect. A Sumvitg eis ei capitau inaga ch’il scolast ei vegnius cun sia scola alla staziun; muort spir reverenza ha el accumpignau il plevon.
Na, il Giachen Giusep Gamboni fuss mai vegnius inaga la gievgia sontga tocca Sedrun, era lu buc, sch’ei vess e tonsch pervia dil temps. Enstagl da cuntinuar siu viadi eis el staus sur notg sin claustra. Quella manida en claustra ei ora ed ora stada per el in schabetg nundetg. Secapescha ch’il pader ceremoniari (pil pli il pader Sigisbert Zwicker) ha fatg cun el bien e pli che bien; el che ha nuota nuidis schau sepuppergnar. E la finala veva el era fatg si in fumegl a casa ed aschia tuttavia buca fuola. Epi – ils ses dueien mo spitgar in’uriala ils ovs da Pastgas ed ils mams.
Probablamein s’ei aunc stau in’autra.
La gievgia sontga da mesanotg vevan ils Gambonis da ir en baselgia a far l’ura. Neve – levar da quellas uras ed ir en tutta ferdaglia a far oraziun. Mals fuss il Gambun staus avunda.
Alluscha ton ei franc. Ir per il sontg Ieli giu Cuera ei adina stau e vegn e adina a restar – ina honur scosauda. Quei ha il Giachen Giusep Gamboni saviu, accurat sco ses antecessurs. Ed igl ei fetg da supponer ch’ils vegnentsuenter sappien era quei.
Pigl auter.
Mo per dir.
In honorari da dus francs e miez per pervenda ed in franc e tschunconta mintgamai per las caplanias, quei tut ensemen dat daveras buca ina gronda summa.

Meinrad Gamboni 1937

La famiglia Gamboni en Tujetsch setegn fermamein vid quella isonza familiara. Dapi igl onn 1965 va Meinrad Gamboni (1937) per il sontg Ieli giu Cuera. Ed el va mintgamai la gievgia sontga cun siu auto tocca sin la Cuort el casti digl uestg ed empleina la cofra. Aschia cun il vehichel ein las staziuns da contonscher maneivlamein.
Na, igl ei buc quei ch’igl ei stau antruras. La premura e la reverenza ein tscheu e leu sin sespiarder. Catechetas e casarinas dalla casa pervenda vegnan encunter e corrispundan ad enzatgi.
La marenda sin claustra lai era il Meinrad Gamboni buca ir ina solia ga surora; aschia paun e schambun ed in migiel vin, uigliez. Quei ei tuttina ina allegria. Pader Bernard Bürke ed il Frater Leci Cavegn ein schi hoflis davos meisa.
Tonca pressapauc allas quater dil suentermiezdi ei Meinrad Gamboni adina a casa a Sedrun.
Buca meins che quater nevs dalla schalatteina Gamboni en Tujetsch ein promts da cuntinuar cun la tradiziun dils Gambuns, per cass che las duas feglias dil Meinrad bandunan l’isonza.

Enzatgei dils Gambonis:
6 generaziuns Gamboni
Uoppen dalla famiglia Gamboni dad Augio
Gamboni a Sumvitg d’Aluis Maissen, Sumvitg

Il Gambun en Sin Cadruvi/Gambun en Sin Cadruvi
da pader Baseli Berther

Tuttenina semida la posiziun dils buobs. Da vitg en vegn in um vegl cun ina trucca si dies ed in canaster en bratsch. Plein legria cloman ils buobs: El Gambun, el Gambun! el o da vender tschareischas! – Tgi seregorda buca cun legherment ed engraziament da quei brav um vegl, che ha fatg tons plaschers als affons da nossa vischnaunca? Pign mument e quasi tuts ils buobs, sco era beinenqual femna e surtut igl aug Luis, in um vegl, che magliava bugen tschereschas, circumdeschan il bien Gambun. El haveva priu plaz osum il baun sur casa da scola. La trucca cotschna en fuorma da turnister, tschent’el ad interim sut il baun en.

El arva si il canaster. Bialas tschereschas cotschnas tarlischan ord quel. Beinduras tunschev’el vi ina ni l’autra als buobs per schar schigiar e far la queida aunc pli gronda. Ils buobs eran denton ils plirs svani denter ils umens per encurir si il bab. Beinsavend tgei quei s’approximar schi beinschit hagi da dir, haveva il bab, ni era il bien padrin – aunc oz engraziel jeu persuenter ! – priu ora la buorsa e dau enzacons raps per schar cumprar tschereschas.

Tgei tschaffen ! Per tschun raps in pugn plein, per diesch raps dus pugns ed aunc in per suren. Aschia eran quasi tuts ils buobs vegni tier tschereschas, ch’els havevan schau metter en lur capetscha ni capiala. Els stevan ussa leu entuorn cun in ni l’auter da lur fargliuns e magliavan quei custeivel fretg en cumpleina cuntentientscha. Gambun haveva bien cor e saveva con bugen ils buobs havevan tschereschas. El deva buna mesira ed ils buobs fuvan era adina cuntents cun quei ch’el deva. Enqual femna e magari era aunc igl aug Luis, che astgavan spender in tec dapli, havessen marcadau bugen da far dar enzacontas dapli. Mo Gambun scheva cuortamein: Ju sa betga da per nuet; ju stu i gliunsch per ellas. Nua? – a Perdomet ! – Nus buobs tertgavan, Perdomet seigi aschia in liug, sco la tiara dall’empermischun, danunder che quels dus buns umens han purtau quella gronda trocla sin in pal.

Gambun fuss atgnamein staus dalla Val Calanca, ha giu fatg la ventira cun maridar ina da Tujetsch, ina Nell, il bab dalla quala, in fravi, fuss vegnend enneu da S. Pieder el Vorarlberg. Siu fegl ha giu maridau ina da Perdomet e quella haveva sper auter survegniu per dota enzacons tscherschers ed a quella buna dunna havessen nus atgnamein d’engraziar per quei prezius fretg. Gambun era in um vegl cun caultschas cuortas, cassacca blaua e purtava per ordinari ina capiala bergamasca cun flisella cotschna entuorn. El tschintschava plaun, empau tral nas, mo haveva in oreifer bien humor. Gl’unviern mava el per las casas, fageva e pinava canastras schi ditg sco enzatgi leva. Denteren raquintava el da tuttas sorts legras historias, aschia ch’el era adina beinvegnius, cunzun als affons. Havessen sias historias buca finiu quasi adina culs medems plaids: Ed a mi han ei dau ina cul caz giu pil dies . . . ni a mi han ei dau in pei . . . e catschau en tiel D. B. e fatg pinar si sias canastras nauschas, sche havessen ins bunamein pudiu crer, che tut seigi sontga verdad. Er’ei empau da quiet en stiva e tschintschavan la glieud pauc, sche deva el tuttenina ina ferma sturnidada, che tut siglieva agradsi. Quei deva nova veta.

La jamna sontga mav’el adina a Cuera per il s. ieli e purtava quel per l’entira Surselva si, ils emprems onns entochen vi d’Ursera – ina honur e favur, ch’era siu fegl ha gudiu e la quala siu beadi gauda ussa. Pilver, ina honoreivla caussa per quella brava famiglia. El ruaussi en pasch, il bien Gambun!

Il Sep Antoni Gamboni- igl emigrant american
Il Gamboni Sep Antoni (1875–1949) da Sedrun, burgheis dalla Val Calanca, ei emigraus ils 28 da november 1903 cul bastiment La Touraine naven da Le Havre. Igl onn 1904, ils 6 d’october, ei sia dunna Mengia Gamboni- Solèr (1874–1906) suandada. Buca ditg sa ella guder il niev ambient e la nova patria. Ella ei morta ils 12 d’avrel 1906. Els vevan giu in baret igl onn 1902. Igl onn 1905 lavura Sep Antoni sco Dairyman, hanletg cun latgiras, ed igl onn 1910 vegn sia occupaziun registrada sco Mail Carrier, portabrevs.
Il Sep Antoni ei returnaus ed ha maridau 1913 la Barla Catrina Schmidt (1885–1972) da Cavorgia. La Barla Catrina ei la feglia da Gion Antoni Schmidt (1846–1933) e Barbara Catrina Benedicta Berther (1844– ). Da ses tschun affons, dus buobs e treis buobas, ein duas feglias serendidas ell’America. Sper la Barla aunc la Maria Giuseppa (1881–1934) che veva maridau il Vigeli Monn (1880–1936) Tiuter da Surrein.
Il Sep Antoni pren danovamein la decisiun da serender ell’America e damonda la vischnaunca per in sustegn finanzial. En quei connex sevolvan las autoritads tiegl Uffeci federal d’emigraziun a Berna. Cun brev dils 7 da zercladur 1923 retscheivan els entginas informaziuns: Naven dils 1.7.1922 entochen ils 30.6.1923 san mo 3752 persunas naschidas en Svizra emigrar els Stadis Uni. Il contingent seigi gia duvraus si entochen il fenadur e pér igl uost e settember seigi pusseivel da retscheiver il visum. La vischnaunca astgi buca sustener emigrants ed era la Confederaziun detti negin sustegn finanzial. Persunas senza lavur e che survegniein leuen lavur, obtegnien in sustegn. Ei seigi da pagar ina taglia dad 8 dollars e mintgin stoppi ver a New York 100.– frs. ed il bigliet per ir el liug da destinaziun. Ils cuosts muntien per Basel – New York 103 dollars e pil tren da New York a St.Paul 45 dollars. Il meglier seigi da pretender ord ils Stadis Uni in affidavit, ina declaronza da garanzia, che zatgi prendi si el e gidi ad encurir lavur.
Il settember 1923 ein els serendi ell’America. Il Sep Antoni veva gia ses 48 onns ed ei sto esser che sia emprema secasada ell’America veva tuttina perschuadiu el ed el ha per la secunda gada ughegiau il pass sulla mar e quei quella gada cun aunc siat affons. Carteivel ha el viu per el e sia dunna e lur affons in meglier avegnir. Quei ei lu era severificau!
La famiglia arriva ils 2 da settember 1923 a New York sil bastiment Belgenland ch’ei partius naven da Cherbourg en Frontscha.
Ils affons:
– Anton Fidel (1916)
– Benedicta (1918)
– Barla Catrina (1919)
– Giusep (1920)
– Emanuel (1920)
– Gion Felici (1921)
– Theodosi (1922)
A Sedrun habitava el la casa sisum il vitg Sedrun, Via Spinatscha nr. 9 . Quella casa veva el retschiert
ord ierta da siu bab Giusep Antoni Gamboni (1829–1896). Il frar Giusep Fidel Gamboni (1866–1945)
ed el vevan tratg la sort ed ei veva tuccau la casa al Sep Antoni.
Sco gia sura menziunau ein ils Gambonis derivonts dalla Val Calanca, dad Augio. Ozildi ei la pintga cuminonza Augio integrada ella vischnaunca da Rossa. Il Cristian Giusep Gamboni ei secasaus a Pardomat Dado sin territori dalla vischnaunca da Sumvitg. El ha maridau la Maria Margareta Decurtins. Il sulet fegl ord quella letg, il Fidel Antoni Mudest Gamboni (1802–1871), ha maridau la Maria Catrina Schmed (1798–1857) ed ei secasaus en Tujetsch. Ils Gambonis portan en lur historia da famiglia la tradiziun d’ir pil sontg Ieli a Cuera e reparter quel ellas pleivs catolicas dalla Surselva. Avon che serender ell’America venda il Sep Antoni sia casa a sia cusrina Onna Maria Venzin-Gamboni (1899–1990). La bagascha vegn pachetada sin in carr ed il cavagl meina els sul Pass Alpsu a Caschinutta sil tren. Davart l’arrivada ell’America scriva il Tumaisch Beer (1877–1966) ils 30 da settember 1923 en ina brev scretta en Tujetsch: Il Gamboni ei arrivaus avon circa 3 jamnas cun sia numerusa famiglia. Hai viu el ed ella la dumengia vargada tier il Sep (Monn) e Rosa. Els han buca saviu star ditg tier lur quinau Solèr muort munconza da plaz. Grad ussa ein ei tier il Sep e la Rosa, leu han ei plitost plaz. El ha aunc negina occupaziun stabla, ha gidau ils ins ed ils auters Romontschs a far en il «corn» (terc).
Tier l’arrivada a New York vevan dus affons la scarlata e l’autoritad d’emigraziun leva metter sut quaratena ils dus pigns. La mumma Barla Catrina hagi protestau vehementamein e cuntonschiu il saver cuntinuar il viadi. Els arrivan a Minnesota ed ils dus affons, il Tony e la Benedicta, san star pli ditg tier il Sep e la Rosa Monn e quei aschiditg sco els ein stai sauns e taffers. La famiglia ei serendida a Withrow en Minnesota. Sep Antoni daventa pli tard in emploiau d’ina cascharia e furneva il latg da casa tier casa. Il fegl Tony daventa farmer.
Dil temps ch’els habitavan a Hugo, Minnesota crescha la famiglia aunc per dus affons, la Rosa ed il Martin.
Igl onn 1938 scriva il Plazi Hendry: In di hai jeu viu il Sep Antoni Gamboni e sia dunna. Els fan nuot e fan meglier che jeu, sai schon! Il Martin Werth scriva 1949: Avon in per uras havein nus retschiert in telefon ch’il Gamboni pign seigi morts. Damaun havein pia dad ir a satrar in Romontsch. Quel sto esser ualti vegls, 74 onns, ed el ruaussi en pasch. Els stevan circa vegn miglias egl ost da nus. Silmeins inaga ad onn vegnevan ei a visitar nus, sco nus era els. Ils affons ein quasi tuts maridai.
Mira aunc dapli en: America 2a part