300 onns baselgia parochiala da s.Vigeli 1691 - 1991 Sedrun
Cun caschun dil giubileum ei cuumpariu ina scartira da fiasta. Il "Plaid sin via" noda ils suandonts patratgs:
Dapresent (1991) sa la Pleiv da Tujetsch festivar il giubileum da 300 onns sanctuari da s.Vigeli. Bein in giubileum che lubescha da far fiasta e dar ina egliada el vargau, ella historia da nossa baselgia. La parochiala, la baselgia da vallada stat en stretg connex cun il decuors dalla veta da mintga parochian ella val, el vitg. Quei ligiom entscheiva gia cun la retschevida dil s.batten. Cheu ein ils biars i per l'emprema gada alla s.communiun. Dumengia per dumengia ha il parochian saviu retscheiver digl altar anora bia grazia e curascha per ademplir ina veta el senn da nossa religiun cristiana. Era il pli davos viadi da nossa veta terrestra meina per la davosa gada en baselgia parochiala per silsuenter ruassar el santeri.
La presenta scartira da fiasta duei confirmar quei ligiom, regurdar a temps vargai e presentar al lectur il losch sanctuari da s.Vigeli cun agid da fotografias. Buca mo igl art duei anflar via en quest document fotografic, mobein era la veta religiusa, las processiuns, messas nuvialas ed auter.
Sappientivamein ei il text tenius cuorts per dar ton pli peisa e plaz allas fotografias. Sin lectura cuntinuonta, pli profunda e scientifica visa la gliesta da litteratura alla fin dalla scartira vi.
Possi quei cudischet anflar la via en mintga casada tuatschina, svegliar interess e carezia per il vargau e promover in spert aviert e da responsabladad per igl art e la veta religiusa en nossa val.
Igl autur
300 onns baselgia da s.Vigeli
S. Vigeli, 1952, l'entrada ei preparada per la primizia da sur Tumaisch Berther, Rueras/Dieni
L'emigraziun ell'America"
