Discuors sur mistregns e mistergners en Tujetsch dil 18 e 19avel tschentaner
ils 20 da schaner 1959
da Victor Berther, Rueras (1915 - 1994)
Pader Placi a Spescha scriva entuorn gl'onn 1805 sur digl art e mistregns en Tujetsch sco suonda: „Jeu anflel en Tujetsch mo il pictur Diogg, il qual ha giu per mumma ina Tschamutra, sco artist e sco mistergners enzacons mo miez empri, zacons lennaris, scrinaris, calgers, cusunzs, cuntschapials ed in fravi. Tujetsch ei en quei grau gnanc cuvretgs per igl agen diever."
Jeu vegnel a sebasar era aunc differentas gadas sin notizias da pader Placi e tut quellas ha il numnau mess a scret entuorn gl'onn 1805.
Serestrenschend mo sin il pli necessari per orientar sur ils mistergners dil vitg e dil vischinadi haiel
rimnau differentas notizias, las qualas ein per gronda part da vischins da nies vischinadi, als quals jeu lessel era cheu engraziar. Nuotatonmeins haiel era interessantas notizias da vischins d'auters vischinadis e perquei tractel era mistergners d'auters vischinadis.
En general san ins dir cun tutta segirtad ch'ei hagi buca dau mistergners tochen el novissim temps, ch'ein seviventai spirontamein mo cul mistregn. Mintga mistergner haveva in'occupaziun accessoria. Bunamein senz' excepziun tenevan ei per l'alimentaziun dalla famiglia tiers manedels ni silmeins ina vacca. Ei deva lura (sco era aunc oz) tals che exercitavan duas tochen treis differentas clamadas. Tals che fagevan empau il lennari, iseglias e miradurs, vegnevan sco oz numnai umens tschecs, e quels, lura sco oz, ston buca esser dependents per mintga clavella d'in professiunalist.
Entir discuors: 
Discuors
L'emigraziun ell'America"
