Teater a Rueras
(Corr.) Per l'emprema gada, Gliendisdis Pastgas vargau, ha la giuventetgna da Rueras dau il drama popular "Atgna cuolpa" da P. Appenzeller. La translaziun en viarva romontscha ha signur Sigisbert Giossi, postenent, Rueras procurau. Era la reschia ei stada en ses mauns. Quei mereta renconuschientscha ed engraziament.
Il toc cun in temperament tut aparti, tracta la historia dallas cavas da plattas a Dialma (Elm). Carezia per patria e spusa stattan en cumbat cun ambiziun e sentiments da vendetga, en consequenza d'ina carezia sbittada.
Cun perseveronza e curascha defenda il herox dil drama Felici Huber, il patratg ch'il cuolm entras sutcavar, vegni in di a sederscher sur il vitg en. Era mistral Streif ei buca dil tut segirs da quei, mo en sia aversiun encunter Huber e per regl dil daner, mo beffrogna el quel e scamonda la carezia tier sia feglia Elsa. Huber enganaus dil mistral lavura vinavon, mo observond el danovamein il prighel, fa el attents la regenza. Aschia unfrescha el la davosa speronza da survegnir Elsa. Taxaus per il calumniader e manzeser ei Huber en mesa desperaziun, mo il cuolm sbaluna e confunda nauschadad e manzegna. Sur las ruinas dil vitg satrau baghegia la carezia ina nova veta. Pli bia lein nus buca tradir.
In cumpliment eis ei da far per la premura dalla giuventetgna, da tschetar in pign recav en disposiziun per ina nova orgla per la baselgia da s.Giachen a Rueras. Ed ussa vegni e mirei. Ils giugadurs sesprovan da dar il toc endretg e Vus saveis esser segirs da passentar in pèr emperneivlas uras a Rueras. Als da Rueras giavischein nus sala fullanada.
er.
L'emigraziun ell'America"
