1951:52 Teater

Teater en tiara romontscha
(Correspondenza) La sesiun dil teater en nos vitgs romontschs ei puspei cheu. Beingleiti vegnan numerus inserats a palesar ils varionts programs, ils fretgs da miniziusa e nunstunclenteivla preparaziun e lavur. Daveras, ina variada mischeida da teaters! ils marcants tetels plein misteris ed attracziun diregian nos pass en auters vitgs, en autras tiaras, enzuglian nus cul manti grischatsch d'epocas gia daditg vargadas ed emblidadas. Nies pievel muntagnard, modulaus en marcants tratgs dil grev cumbat pil paun da mintgadi, banduna bugen silmeins per in'uriala, il mudergiont present, pleins d'incertezia e malsegirtad.
Havend surlegiu ils differents inserats vegn beinenqualin ad haver da sedecider. In proverbi romontsch di gie: "Tgi che ha las letgas, ha las setgas." Nus lein gidar vus ord las pitgiras. Studegein in mument igl inserat dil teater a Sedrun! Sco vus veseis representa la Cumpignia da mats Tujetsch in darma che vus haveis aunc mai viu, in toc che resuna per l'emprema gada en viarva romontscha, ina representaziun da variaziun e tempra tut speciala: "Cuolpa ed expiaziun", drama en 5 acts da Johann Radermacher, versiun romontscha da Sigisbert Giossi, Rueras.
Il toc sepassa en Spagna, alla cuort dil bien cont Francesco. Cun intrigas e rampins sesprova il fegl vegl d'allontanar siu benjamein, per aschia daventar sulet artavel da siu bab. Po il success momentan era esser gronds - alla fin triumfescha la noblezia dil cor da Rodrigo. 
In drama plein tensiun e variaziun! Tgi less aunc targlinar da vegnir in da quels dis ni sera a Sedrun? Segir sas Ti sedrizzar da vegnir en Tujetsch.
V.B.

Veta tuatschina
Danovamein han las obligaziuns quotidianas tschessentau l’animaziun e fuola festiva. Las fiastas ein daditg vargadas, ils numerus gasts, ch’ han gudiu per entgins dis la bellezia de nossas muntognas, ein puspei serendi a ca-lur, ed ils muntagnards han puspel repriu cun tutta detschartadad lur lavur ordinaria.
Daveras, la sesiun ei stada buna — hotels e casas privatas bein occupai, e quei factum ha segiramein encuraschau empau ils interessai suenter tons onns maghers e schetgs. Las relaziuns de neiv ein stadas relativamein favoreivlas, e segiramein ha in e scadin hosp registrau sia dimora a Sedrun denter las bialas regurdientschas de sia veta.
Deplorablamein tschessa il catsch d’ jasters sur Nadal e Daniev bia memia spert ad in’epoca macorta e vita ed ei sto esser in pensum de noss industria d’jasters de tschercar mieds e mesiras per dar veta al passadi dil schaner el fevrer.
Ei fuss incumplet de tschintschar della scumiada digl onn, senza menzionar la producziun de teater de nossa Cumpignia de mats: «Cuolpa ed expiaziun». Sgr. Sigisbert Giossi ha dau al toc ina stupenta versiun romontscha, ed era sco regissur ha el capiu d’inflammar ils acturs e tschentar in sco l’auter ella situaziun giavischada. Oravontut ad el, mo era als acturs e collaboraturs ch’han prestau tonta minuziusa lavur ed unfriu tontas uras per igl interess general e nossa Cumpignia de mats admettein nus in sincer engraziament.
Il bien success possi encuraschar il translatader sco era ils acturs d’era dacheudenvi sededicar a quei bi pensum.
V. B.

 

Historia da Tujetsch sa era fascinar Tei!

0270
CuviartaAmerica

Historia dall’emigraziun tuatschina ell’America: Na, na, anora mass ju per de biè bétga plé. - cumpariu 2011 pdfAmerica

mp3AmericaTujetschL'emigraziun ell'America", emissiun d'Esther Berther ella Marella dil RR. Emissiun da Radioscola 1966 sur dall'emigraziun americana dad A.Maissen
Giuv Film
1816/17 - igl onn senza sulegl ed igl onn dalla fom. Mira: A la sumbriva dal tambora

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

06-1967.jpg