Garcia Moreno a Sedrun (- Program)
(Corr.) Ils enconuschents acturs da Tujetsch han turnau a pegliar la curascha da producir in drama pli grond. Quasi per celebrar ina specia da giubileum ein els turnai tier il toc: Garcia Moreno, daus avon 25 onns. Ils habels acturs da lezs onns sesan oz ellas sutgas, laian reviver la regurdientscha da quellas uras e selegran, che la giuvna generaziun tila buc ord la bun’era ed ha era brav bien lenn. Da quei fatg ei la producziun dalla dumengia vargada stada ina clara e legreivla perdetga. Nua che mintgin fa il siu, ei il scribent ni scaldaus ni nudaus da reparter arbagias specialas. Mo ton mereta la verdad da constatar che tuts han priu lur pensum sil serius e dau lur rollas per gronda cuntentientscha digl auditori, e quei dil pli pign entochen ils gronds. Ed a vesta dalla biala prestaziun totala, tgi less era far “il nausch ugau da spenda che anfla dapertut la menda?”
In tschupi less jeu denton tuttina dar, ed in bein meritau, e quei al vegl translatur e regissur Gion Felici Monn. Igl ardiment e la premura da lez mereta tut laud. La producziun seriusa e bein preparada d’in bi drama en nos vitgs ei buca mo in passatemps; quei ei ina caussa edificonta ed ina buna scola per acturs ed auditurs e s’auda buc il davos tier la cultura romontscha. Semettend aunc cun ses 66 onns da tala ardur ed exemplarica premura en survetsch da nossa giuventetgna e dallas societads, sa nies premurau amitg romontsch haver la biala satisfacziun dad ademplir ina impurtonta e meriteivla missiun e da raccoltar l’engrazieivladad da sia glieud. – Als acturs da Tujetsch giavischein nus da cor in numerus ed engrazieivel publicum per las suandontas producziuns.
-st.


Garcia Moreno a Sedrun
Quei ei stau in plascher d’assister al teater a Sedrun: La mort da Garcia Moreno. Savess ins giavischar oz, en quei temps d’embrugls e scumbegls, in pli bi exempel d’in um magistrat catolic che quel d’in Garcia Moreno? La representaziun da Sedrun cloma puspei en memoria quei campiun. Igl ei buca fantasia. Igl ei in toc che sebasa sin verdad historica. Garcia Moreno pren il guvernagl digl Ecuador, empeila la politica el senn e spért da sia cardientscha, conceda la dueivla libertad dalla baselgia e leventa cheutras la gretta dallas ligias secretas. Quels engiran vendetga. Moreno sto curdar. El meira (1875) per sia cardientscha e sia politica catolica. Ils acturs da Tujetsch fan stupent. Ins senta il maun versau dil regissur ed igl anim grond dils acturs. Possien ei puspei ver in cumplein success dumengia ad otg, ils 14 d.q.

- Program