Dretg il regissur sur Giusep Durschei, plevon a Sedrun
Teater a Sedrun
Il Tell da Paul Schöck ei senz'auter in'ovra dramatica bein gartegiada, sempla e mudesta en sia construcziun e dimensiun. - Ils fatgs pesonts historics che succedan per las cuntradas giu sper il lag dallas treis tiarettas s'entaupan tuts en ina bufatga stivetta purila. La sligiaziun tecnica ei aschia ordvart leva e perquei tuttavia beinvegnida en nossas relaziuns. - Il pievel giu sper il lag cun sias veglias schlattas burgheisas ei en siu sentir entir entratg parents cun nus auters. Nus capin fetg e bein siu patratg e siu agir e quitein beinduras da stuer cargar viaden en lur fatgs e gidar atras il spessom selvadi da lur veta luvrera sils splems dalla glisch, la dumengia da lur patratg patriotic ... O, igl ei ver ch'ils fiugs che han ars lezzas uras per cullinas e sumfils han è stendiu lur bratscha sur ils precipezis giu en las valladas dalla Rezia e fatg tschessar silmeins ruc a ruc ils grevs tscheins-fier da signuria 
feudala.
La versiun romontscha dalla plema da sur plevon Giusep Durschei ei excellenta. Siu lungatg popular. moderau e precis vegn a far plascher a mintga auditur. Malgrad sia gronda lavur pastorala eis el buca senuspius da surprender è aunc la reschia. Igl ei quei daveras ina stunclenteivla lavur e bia sacrifeci ... e nus sperein beinbugen che tonta premura e spért da lavur porti agli ina reha raccolta. Milsanavon lein nus tuttavia buca tralaschar da menziunar il gerau tecnic, signur Sigisbert Giossi, il maun dretg dil regissur. Il Sigis sco ils Tuatschins numnan el, ei in giuven spir ideal e premura che capescha era sez da menar la plema enten far translaziuns e far il regissur.
Nus giavischein da cor a nos cars mats in cumplein success ed ina tschecca cassa, han els sco franc aunc autras cumpignias e societads soli il teater che porta in tec metal en gaglioffa.
Sep da Foppas
| ............ |
|
L'emigraziun ell'America"
