Tujetsch 2008
Tujetsch – vischnaunca prosperonta

La vischnaunca da Tujetsch sesanfla sisum la Surselva e cunfinescha cugl Uri e col Tessin. Il Pass digl AIpsu colligia Tujetsch cun Ursera. AI Lag da Tuma sesanfla la tgina dil Rein. Tschentaners alla liunga ei la populaziun tuatschina vivida dall’agricultura. L’e×plotaziun dallas auas ei stada ina impurtonta resursa per la cassa communala ed ha possibilitau da migliurar l’infrastructura publica e da promover il turissem, Il plazzai intermediar dad AlpTransit a Sedrun ha purtau lavur e luvrers elia Val. Il project dalla Porta Alpina ha svegliau novas sperenzas, ei denton restaus ina visiun.
DA MARTIN CABALZAR

IIs historiografs supponan che la Val Tujetsch seigi vegnida colonisada suenter la fundaziun dalla claustra da Mustér egl 8avel tschentaner. El 12avel tschentaner ein colons vallesans vegni sur il Cuolm d’Ursera (Alpsu) e secasai ella part sura da Tujetsch. II num da Tujetsch vegn menziunaus I’emprema gada 1205 en connex culla baselgia parochiala da Sedrun. Per liung temps ei Tujetsch staus incorporaus ella abbazia da Mustér che regeva era la Val d’Ursera. Ina famiglia da ministerials che habitavan el casti da Putnengia (Dieni) haveva d’administrar la Val en num digl avat. In da ses representants, igl avat Pieder de Putnengia, ei staus 1424 confundatur dalla Ligia Grischa. Avon la colonisaziun era igl intschess Tujetsch curclaus cun in grond uaul selvadi. La runcada ha giu per consequenza che pliras lavinas ein sederschidas a val. Igl onn 1749 ha ina lavina satrau la gronda part dil vitg da Rueras e caschunau 64 mortoris. In drama semegliont ha pretendiu 1817 27 unfrendas. A Selva ein 25 persunas vegnidas per la veta igl onn 1818 pervia dalla lavina. IIs onns 1785 e 1949 han incendis devastau praticamein igl entir uclaun da Selva e 1822 ha in barschament destruiu Camischolas. Entochen la mesadad dil tschentaner vargau ein ils purs stai ella puralitad en Tujetsch. Eis tenevan armauls e tiers manedels per il provediment da latg, carn, pials e launa e cultivavan dumiec, segal, glin e truffels pigl agen diever. II tschespet patern ei denton staus memia strebels per nutrir tut ses vischins. Aschia han biars stuiu bandunar la Val. IIs emprems em!grants ein s’engaschai sco mercenaris. In annuari da 1628 rapporta d’ina emigraziun da 200 persunas. La pli gronda emigraziun cun varga 500 persunas ei denton succedida suenter la secunda mesadad dil 19avel tschentaner viers Baviera ed America dil nord. 1939 dumbravan ins en Tujetsch aunc 144 purs, oz 22. II diember d’animals ei denton restaus praticamein tuttina.

Per ina midada essenziala ella veta economica en Tujetsch ha la construcziun dils lags da fermada Curnera e Nalps dalla Ovra electrica Reinanteriur (1955-1967) purtau. Grazia als recavs resultonts ha Tujetsch saviu realisar differents projects publics e promover il turissem. L’avertura turistica ei era vegnida facilitada entras la realisaziun dalla via sugl Alpsu (1863) ed entras la lingia da Viafier Furca-Alpsu (1926).

L’entschatta dil 20avel tschentaner vegnan ils emprems skiunzs sur I’Alpsu a Tujetsch, 1914 vegn il club da skis fundaus, 1929 la scola da skis. Dapi 1942 cursescha il tren era igl unviern e denter 1956 e 1962 han ins realisau en Tujetsch ina sutgera e plirs runals.
Enteifer ils davos 40 onns ei Tujetsch sesviluppaus d’ina vischnaunca da purs ad ina destinaziun turistica flurenta.

Igl onn 1995 han ins entschiet cullas lavurs da construcziun dalla Neat che ha purtau numerus luvrers jasters en Tujetsch e dau novs impuls all’economia.

In scazi natural ein las cristallas ed il crap scalegl. II turissem e la gronda activitad da construcziun han denton era midau la structura e la tenuta dils indigens.

Malgrad tut sesprovan ils Tuatschins da salvar lungatg e cultura e da tgirar lur genuin dialect tuatschin. Vic Hendry, oriunds da Cavorgia, ei in dils pli productivs scribents romontschs. El ei vegnius undraus cul Premi cultural grischun.