La corda da paternos – il paternies

La corda da paternos ei la corda da dumbrar il decuors d’ina oraziun che vegn quasi duvrada en mintga religiun.
Il paternies dalla Baselgia catolica consista il bia ord 59 curals che indicheschan inaga in babnos e tschun ga diesch salidadas. La finiziun fuorman treis curals che simboliseschan: cardientscha, carezia e speronza ed ina cruschetta. Sper la funcziun da dir rusari survescha el era sco schenghetg per las pli differentas occurrenzas ecclesiasticas, nozzas, emprema communiun, creisma ed auter. El vegn era applicaus sco agid en miseria e malsogna. Vegn la corda da paternos purtada vid il tgierp, survegn ella in caracter dʹamulet. Paternos cun dapli curals ein il pli savens il mussament da sʹudir ad ina confraternitad ni congregaziun. Ils paternos ein construi ord il pli different material: pedras da veider, lenn, perlmut, cocs da fretgs ed autras materias. La dumengia s’udeva il paternies adina en sac. Era ad alp vegneva il paternies purtaus en sac e patertgond vid l’admoniziun dalla mummma, vegneva recitau il babnos en muments da peda. Tier nus funcziunava il paternies era sco amulet per tener naven ils nauschasperts. En casa pendeva meinsvart il paternies en stiva ed ellas combras da durmir e quei vegneva era praticau ellas tegias da mises, ad alp ed en nuegl.

Empau historia
Il rusari ei seformaus el temps miez. Pils ins posseda el in effect spiritual per s’avanzar a Diu, auters numnan semplamein el in sburbatem. Negina autra oraziun dil cristianissem ha ina tala diverstitad historica sco l’oraziun meditativa dil rusari. Quei semuossa era ella cadeina da paternos, il paternies. El vegn duvraus per dumbrar e per buca secumblidar ed ir a piarder ella monotonia dallas fuormas repetentas – ni forsa tuttina dapli?

In tal agid ei denton negina specialitad e particularitad cristiana. Era autras religiuns drovan cordas d’urar, aschia dumbran ils muslems ils 99 nums d’Allah cun la „subhah“. Brahmans hinduists e budists drovan la cadeina da curals, numnadas „mala“. Las oraziuns  en roda sco il rusari el cristianissem surveschan sco mied da meditaziun ed d’approfundaziun.

Els ein ils antecessurs dalla cadeina da paternos dad oz, dil paternies. Las cadeinas da paternos dil temps miez, sco il num tradescha, survevan per dumbrar ils 150 paternos che fuvan lu usitai pils laics, enstagl dils 150 psalms dalla bibla perscrets d’urar ellas claustras.
El 13avel tschentaner vegnan ils fabricants da cadeinas da paternos numnai ils paternosters. Sco pli veglia mistronza vala quella dils fabricants da paternos a Paris entuorn 1260 che fagevan era diever da materialias dil vest per la fabricaziun: ossa, coralas, gagat, mummaperla, ambra, cristal, fildirom, fil da mesch e glas.
En nossas regiuns muntagnardas s’udeva la construcziun da rintgas d’ossa per cadeinas da paternos a mistergners els castials ni en dacasas els marcaus. Quei attestan  anfladas en fuorma da curdems da producziun. Sco material primar survevan l’ossa d’animals da casa.

Ils Cisterciens laian flurir pli e pli fetg la veneraziun da Nossadunna e quei entuorn la midada digl emprem milleni. El decuors dils proxims tschentaners procuran els ch’igl avemaria daventa plaunsiu in’oraziun populara e remplazza il babnos sco oraziun da roda. El 15avel tschentaner retscheiva il rusari sia versiun definitiva. All’entschatta fuva il rusari ina caussa dallas claustras e dils marcaus. Per propi gudogna il rusari sia posiziun sco oraziun suenter igl onn 1475 e quei cun grond susteniment dils Dominicaners. Lur engaschi semanifestescha cun la legenda da lur naschientscha. Tenor lezza ha Maria sezza revelau a sogn Dumeni il rusari. Oravontut sco arma effectiva encunter ils Albingensers, encunter ils quals il predicatur perdegava el sid dalla Frontscha. Sogn Dumeni ha sinquei derasau quella oraziun el pievel, aschia raquenta la tradiziun. Ellas valladas dallas muntognas vegn il rusari accentuadamein da casa per el 17avel tschentaner.

Co vegn quella oraziun da successiun cun la cadeina da paternos tiel num rusari? Da quei raquenta la suandonta legenda. Ella raquenta d’in um giuven cun ina veta plitost peccaminusa, mo fuva denton in fervent veneratur da Nossadunna. El ornava ina certa statua da Nossadunna regularmein cun in tschupi da rosas. In di sedecida el per la veta claustrala sco Cistercien. Muort la strentga clausura saveva el buca pli tgirar sia disa carezada. In pli passau pader cusseglia ad el da surdar a Maria in tschupi da 50 avemarias enstagl d’in tschupi vargheivel. Quei tschupi pudessi far pli grond plascher a Maria. Il giuven suonda il cussegl e venerescha Maria da lu naven cun in tschupi da 50 avemarias – il rusari. Segiramein deriva il num rusari era perquei che caglias da rosas simboliseschan Maria ellas ikonas cristianas. Veglias presentaziuns muossan tschupials da rosas ord flurs da rosas.

Da gronda impurtonza per la derasaziun dil rusari e siu success ein las confraternitads. Las empremas confraternitads neschan a Douai en Frontscha, lu ad Augsburg e Cologna. Igl onn 1474 sefuorma la confraternitad a Cologna cul priur dalla claustra dominicana, Jakob Sprenger. La fundaziun a Cologna inflammescha gronda sensaziun, ton che imperatur Friederich III fuva presents tier la fundaziun e s’enscriva el rodel dils commembers. Quei ha fatg impressiun. Duront ils suandonts onns sefuorman en ulteriurs loghens confraternitads dil rusari tenor il muster da Cologna. L’affluenza ei stada gronda. Il commembradi fuva aviarts per tuts fideivels e custava negina contribuziun. Quei fuva auter che tier las confraternitads tradiziunalas. Ei regeva negina differenza denter umens e dunnas, denter reh e pauper. Ils commembers s’obligavan da recitar mintga jamna treis rusaris. Aschia daventa il rusari ina oraziun populara.

En Tujetsch ei la Confraternitad dil sogn Rusari vegnida fundada igl onn 1691 e quei gest cun l’entschatta dall’erecziun dalla baselgia da s. Vigeli a Sedrun. Igl altar da Nossadunna da vart seniastra ei dedicaus a quella confraternitad. La fiasta dil sogn Rusari vegn festivada l’emprema dumengia dil meins d’october ed ei semantenida entochen al di dad oz. Cugl onn 1971 calan las registraziuns el register dalla confraternitad che han priu si’entschatta igl onn 1691.
Autras confraternitads eregidas en Tujetsch ein: A Sedrun ei vegniu fundau 1609 ina Confraternitad da s.Giachen. Igl onn 1888 ei la Confraternitad da Nossadunna dil ss.Cor vegnida fundada a Zarcuns. Igl onn 1892 a Rueras, la Confraternitad dil sontgissim Cor da Jesus. La Confraternitad dil sogn Scapulier vegn introducida a Sedrun, ils 18 da schaner 1703.  La Confraternitad dalla s. Affonza ha priu si’entschatta igl onn 1935.

La fuorma dalla corda da paternos catolica ei enteifer ils tschentaners struschamein semidada, in’excepziun ei che la corda da paternos ha survegniu 59 curals. Da quels ein 50 pigns curals per la salidada e cumpigliadas en ina gruppa da diesch che vegn mintgamai interrutta cun in pli grond cural pil babnos. Quei paternies vegn en diever alla fin dil 15avel tschentaner. Pli giuvens ei igl element dalla part che penda vid la corda. Igl ei ina cuorta corda libra fermada vid la corda da curals. La corda finescha cun ina crusch ed avon quella ei in cural da babnos e treis salidadas. Ina fuorma pli pintga ein ils paternos da detta ni paternos en fuorma da bratschalets.

1 babnos 10 salidadas 1 babnos 3 salidadas 1 babnos cardientscha

La moda d’urar il rusari ei reglamentaus precisamein e suonda in ritus dau. L’oraziun entscheiva culla sontga crusch e la cardientscha cun tener la crusch enta maun. Lu suonda in „Gloria sei al Bab ed al Fegl ed al Spert Sogn, sco igl ei stau all’entschatta, uss ed adina ed en perpeten. Amen.“ ed in babnos. L’oraziun cuntinua cun treis salidadas cun las supplicas per bunas vertids cristianas:
Jesus che duei carschentar la cardientscha.
Jesus che duei rinforzar la speronza.
Jesus che duei inflammar la carezia.
Cul  „Gloria sei al Bab ed al Fegl ed al Spert Sogn, sco igl ei stau all’entschatta, uss ed adina ed en perpeten. Amen.“ finescha l’introducziun.

Ussa suondan ils tschun misteris che consistean ord 50 avemarias, ch’ein parti en gruppas da diesch. A mintga gruppa da diesch ei ordinau in aschinumnau misteri, in dogma che pertucca la veta da Jesus e sia mumma Maria. Mintga misteri pren l’entschatta cun in babnos e la fin suonda in  „Gloria sei al Bab ed al Fegl ed al Spert Sogn, sco igl ei stau all’entschatta, uss ed adina ed en perpeten. Amen“. Ils misteris da letezia tractan l’annunziaziun da Jesus a Maria, lu l’affonzs da Jesus. Lu suondan ils misteris da tristezia che tractan la passiun e mort da Jesus. Ils misteris dalla gloria tractan la levada da mort en veta da Jesus, sia ascensiun, la vegnida dil s.Spért, la mort da Maria e l’encorunaziun da Maria en tschiel.

Il rusari ensiara las duas pli impurtontas oraziuns cristianas, il babnos ed igl avemaria. Il rusari ch’ei vegnius derasaus il temps miez entras ils Domincans fuva aunc buca quel dad oz culla veta da Jesus. Lu consisteva igl avemaria mo ord l’emprema part dall’annunzia digl aunghel Gabriel (Lu 1.28) ed il salid da Lisabet a Maria e la cumpletaziun cun Jesus ni Jesus Cristus:

Salidada seis Ti Maria,
pleina da grazia il Segner ei cun Tei
Ti eis benedida denter las dunnauns
e benedius ei il fretg da Tiu best Jesus.

La gronda differenza cul rusari dad oz ei ch’ils misteris muncavan aunc. Els ein oz ina part essenziala entras reglamentaziun da papa Paul VI  (1963-1978) e Gion Paul II (1978-2005) ed ein oz ina part impurtonta dil rusari.

Ina midada essenziala dil rusari ei succedida igl onn 1568. Papa Pius V ha definau ligiontamein il rusari ella fuorma ed intent. Sias ordinaziuns, sias circularas e decrets pertuccont il rusari han dau ad el il num „papa dil rusari“. Pils plaids digl avemaria ei la brev papala davart il rusari da Pius V. (1566-1572) stada fetg impurtonta. La midada ei la part aschuntada dapi lu cun la part dalla supplica:

Sontga Maria mumma da Diu
roga per nus pucconts,
ussa e sill’ura da nossa mort.
Amen.

Igl onn 1572 introducescha papa Pius V. la fiasta dil sogn Rusari. Effectuau quei ha la victoria dalla vart catolica encunter ils Tercs ella battaglia da mar da Lepanto ils 7 d’october 1571. Il papa fuva perschuadius ch’igl urar il rusari hagi gidau alla victoria encunter ils Tercs.

Il diever dalla corda da paternos va aunc pli lunsch che mo pil recitar il rusari. El 16avel tschentaner daventa la corda da paternos in accessori da moda che las dunnas purtavan entuorn veta. – Entochen il 17avel tschentaner laian umens purtretar cun custeivlas cordas da paternos sco simbol da rihezia, eleganza e bialaveta. – Duront bia epocas survescha la corda purtada publicamein sco attribut religius per sedeclarar sco commeber dalla baselgia catolica. – Oravontut entochen il 18avel tschentaner fuva ei in usit derasau da schenghegiar in maletg religius, ni ad in altar ina corda sco unfrenda. – Sin dessegns votivs dil 18 e 19avel tschentaner portan ils purtretai il pli savens ina corda sco segn da pietad. – Sin maletgs da baras ni da morts sepresenta la corda sco enzenna per ina mort cristiana. – Als morts en bara vegn tochen al di dad oz mess entuorn maun in paternies. – Pil di dalla sontga communiun e creisma ei il paternies in schenghetg appreziau da regurdientscha. –  Era objects d’art retscheivan meinsvart digl artist ina speciala valeta ed atgnadad cun metter tier la corda da paternos.  – Vulend ni nunvelend mettan ils catolics ina certa forza magica ella corda da paternos ed el rusari. Cordas anflan per semeglia era la via egl auto e vegnan pendidas vid il spieghel sco talisman e protectura.

Il sogn rusari dils morts
da Gion Deplazes, Surrein
……. La bara era denton tschentada sin baun sisum la stiva, curclada mo cun in batlini da morts, aschia ch’ins pudeva tscharner il nas git. Si da tgau fuv’ina meisetta cun in crucifix denter las duas candeilas e la glimera amiez avon il crucifix. Sper la glimera in parlet cun aua benedida ed ina frastga palma lien. Ei secapeva da sesez che mintga fiug tarmettev’enzatgi a rusari da morts. Sche pusseivel carschi. ……

…….Ins ughegiava strusch da paterlar dad ault ed entscheveva cul rusari, schigleiti ch’in triepet fuva presents cun in «caluster» per dar l’entschatta e dir la litania ed ina buoba gronda per dir ils misteris. Lezza entscheiva culs misteris da letezia, cuntinuescha cun quels da tristezia per finir cun quels da gloria. Als cuors suondan lu la litania lauretana, ils tschun pugns e las tschun plagas. Aschia in rusari grond cuzzava ualti exact in’ura. …..

Engraziament
suenter mintga rusari da morts en stiva da bara. La famiglia dil defunct recitava:
Dius paghi e Nossadunna, el trostegi (sturtegiar) las olmas cul sogn Parvis (3 ga)
Niessegner e Nossadunna veglien da da vus la piaglia e dis olmas el sogn Parvis.
Speronza tge si’olma segi ni vegni taunple glaiti al sogn Parvis, lu vegli el (ni ella) a ruie (rugar) per nus.
Niessegner detti da tuttas olmas al sogn Parvis, ellas ruaussien ain paisch.
Cecilia Hendry (*1923), Cavorgia/Sedrun

Fuorma dil rusari (pign e grond)
Il rusari pign ha 5 cuors, in cuors ha 10 salidadas. Tier mintga cuors vegn recitau d’ina persuna il misteri e da quels dat ei da treis sorts: dalla letezia, dalla tristezia e dalla gloria.
Tiel rusari grond vegn rugau treis rusaris pigns culs differents misteris cun cardientscha, tschun pugns e las tschun plagas.
Dir a casa dil miert rusari:
era mintgamai in rusari grond ni enqualga in pign. En stiva dil miert vegenvan la meisa e canapè mess en in’autra stanza. Lu mav’ins tiels vischins per sutgas. Tier nus era il meinarusari adina la medema persuna. (Calger Cadruvi. Avon che lez sepresentava era tut met – negin che leva far caplon. Ins stueva saver ordadora la litania latina! Ins spitgava semplamein il caplon, il meinarusari.)
A. Candinas, Surrein