Pader Baseli Berther

Sco negin auter cronist e historiograf ei pader Baseli Berther enconuschents alla populaziun tuatschina. Cun sias lavurs all’entschatta dil 20avel tschentanerx ha el derasau simpatia ella val. El ei vegnius legius, respectaus e sustenius dalla populaziun. El ha fatg enconuschent l’interessanta historia, ha fascinau il pievel e mussau las rihezias historicas e culturalas dalla val. Il pievel ha legiu e dau vinavon – raquintau cun deletg la historia e las historias da pader Baseli. Las varga curonta publicaziuns da pader Baseli ein pil pli lavurs religiusas. Las autras ein per propi lavurs davart la historia dalla Val Tujetsch e Cadi. Ton ch’ins sa parter siu entir relasch litterar en treis parts: Quella sur da sia patria Tujetsch; lu ina part davart la Cadi, oravontut publicaziuns sur dalla vischnaunca da Muster e lu la part religiusa.

Tom I
Tujetsch
Ovras Tom I
Il cuntegn:
Il pader, cronist e historiograf
Sas era nua Giuv ei?
Sin Cadruvi
Selva avon 100 onns
A Camischolas
Baselgias, capluttas e spiritualesser da Tujetsch
A Sogn Giachen
Suenter visapras
La sera da pustretsch
Treis manuscrets
Notizias sur da Tujetsch

Tom II
Scartiras culturhistoricas dalla Vischnaunca da Mustér e dil Cumin dalla Cadi
Biografia e poesias
Ovras Tom II
Il cuntegn:
Il pader, cronist e historiograf
Il cumin dalla Cadi da 1656
Notizias sur ils zenns da S. Gions a Mustér
Sontga Catrina a Mustér
Ils Bannerherrs dalla Cadi
Avon onns
Reminiscenzas d’in vegl curant da Mustér
Pader Baseli Berther OSB 1858–1931 – Sia veta sias ovras
Poesias da pader Baseli

Tom I e II
Ovras Tom I e II
Ideal per encurir en omisdus toms!!

Aunc auter da pader Baseli Berther
Bibliografia
Diversas da pader Baseli Berther
Scartiras biograficas
Spazzatgamin – ina cumedia
En memoria da siu tschienavel di da naschientscha

Ils dus cudischs ein da retrer dil
Forum cultural Tujetsch, Via Alpsu 62, 7188 Sedrun

En memoria digl aultreveriu signur
Pader Baseli Berther OSB da Tujetsch  (sco PDF)

Conventual dalla venerabla claustra da Mustér da Gion Disch

Veta perpetna schai el confiert,
Quei fa flurir la fossa sc’in iert.
Cristus ha mort e puccau dumignau
Ord stgiradetgna la glisch carmalau.

Anno 1931 ha il zenn grond notificau giud la tuor claustrala a Mustér a siu convent, al vitg ed alla vischnaunca da Mustér, ch‘ igl aunghel dalla mort hagi, per la quarta gada en quei onn, spluntau vigelgia Nadal, ils 24 da december, vid la porta claustrala.
Strusch fuva la frestga fossa seserrada sur las restonzas terrestras digl aultreveriu pader decan Anselm Waser, sch’ei in’autra fossa sesaviarta avon la basilica da s. Martin, avon la oreifer restaurada baselgia claustrala da Mustér, el pign mo idillicamein postau santeri dil convent. Quella fuva destinada da prender tier sesezza il habit mortal d’ina olma generusa, d‘ in caracter ferm e decisiv.
Udend danovamein il zenn claustral a tuccar da miert scheva quella gada mintgin tier sesez: Pader Baseli ei morts, Dieus hagi si’olma!
Vegnend igl aultreveriu signur plevon resignau, Tumasch Berther, il zun carezau frar dil defunct, satraus sonda ils 22 d’uost dil medem onn a Sedrun sut grond’assistenza da clerus e pievel, haveva il premurau miedi, sgr. dr. Stiafan Berther dictau al pauper pader Baseli arrest en sia cella, la quala el dueva vivs mai pli bandunar.

Pader Baseli ha tscherniu la glisch dil di a Dieni ella biala val Tujetsch anno 1858 la vigelgia s. Martin, ils 10 da november.
Sin Dieni, anno 1555 scret Döny, la cuort dil Toni, haveva Duri Battesta Berther naschius ils 30 d’avrel 1816 e morts ils 26 da november 1882, siu pign reginavel ensemen cun sia consorta Onna Maria Urschla Schmedt, naschida 1821, ils 17 da zercladur e morta ils 28 d’avrel 1898. Dieni schai strusch 100 m dadens Rueras e secumpona ord la pintga, tipica casa tujetschina da quaders cun mugrins e la gronda clavadira gest dasperas. Omisdus baghetgs schaian sur la scarpa dil stradun dall’Alpsu en ina squadra che sestenda sin vart settentrionala en pintga pendenza denter Val Giuv e Val Mila en admirabla contrada muntagnarda.
Sut il stradun schai en proxima vischinonza da Dieni, sper Plaunmiez, la ruina dil casti dils niebels de Pultengia, alla quala schlatteina il grond avat Pieder dalla claustra da Mustér apparteneva, il fundatur dalla Ligia Grischa (1424). Occidentalsettentrional da Dieni ei Giuv cun la caplutta da s. Bistgaun, uss dil tut depopulau, ed occidental dil tuttafatg serasan ils cuolms permavauns-atunils da Mulinatsch, Milez e Caspausa. Tramontan schaian sur teissa spunda viers la Val Mila las tegias da Malamusa, Alp e Péz Culmatsch, ils gigantics Pez Ner, Mutsch, Pez Giuv e Crispalt.
Visavi alla casa da Dieni serasa sin l’autra vart dil Rein, sur ina bellezia pastira, il gigantic Uaul Surrein per liung e per lad en altezia e sur ses confins sestenda l’Alp Tgom tier igl Uaul Davos Nacla e Val Nalps. Era cheu sesaulzan dretg e seniester suenter las vals lateralas Nalps e Curnera ils gigants dil mund alpin ellas neblas e lunsch sur quellas orasi.
En quella cuntrada ha il pign Giachen Martin, aschia ei pader Baseli staus numnaus el s. batten, passentau ses giuvens onns sper ses quater fargliuns:

1. Tumasch Giusep, n. ils 9 da mars 1853, morts sco gia menziunau, ils 19 d‘ uost 1931.

2. Onna Maria Urschla, n. ils 6 da november 1854 e morta ils 10 da matg 1922. Ella ei stada semaridada ils 6 da fevrer 1877 cun Gion Michel Monn da Sedrun ed ha schenghegiau a quel 3 affons, dils quals in fegl ed ina feglia ein aunc en veta. Il fegl ei maridaus ed ha 5 affons.

3. Vigeli Giusep, numnaus Sep da Dieni, ei staus naschius ils 12 da matg 1856 e morts ils 16 da mars 1925. El ei maridaus ils 9 da november 1886 cun Barbla Catharina Deflorin da Camischolas. Els han schau anavos dus affons, fegl e feglia, maridai omisdus. Il fegl Baseli ha da 14 affons aunc 11 en veta, 5 fegls e 6 feglias. La feglia Barbla, maridada cun Vigeli Monn da Sedrun ha giu 11 affons, dils quals quater mats e quater mattauns vivan aunc. La mumma ha stuiu bandunar aunc giuvna la famiglia ils 11 da schaner 1925 per serender ella patria celestiala.

4. Giachen Martin, n. ils 10 da november 1858 ei morts sco pader Baseli a Mustér, ils 24 da december 1931.

5. Maria Turte ei naschida ils 13 da fenadur 1860 e morta ils 24 da fevrer 1925. Ella ei stada maridada ils 19 da november 1887 cun Sigisbert Berther da Camischolas. Quella sora ha giu 6 affons, dals quals dus ein aunc en veta, in mat ed ina giuvna maridada.

Ils geniturs da nies pader vivevan en tema da Diu ed han tratg si lur affons, giuvens e giuvnas cun grond quitau e carezia ed educau els cun plaid, fatg ed exempel tier quei ch’els tuts ein daventai, tier buns cristifideivels da tgierp e dad olma.
Il bab Duri Battesta fuva pur, sco quasi tut ses conburgheis e vischins. El fuva atgnamein oriunds da Camischolas, nua che ses geniturs Vigeli Berther e Maria Turtè n. Paly havevan pitiu zun fetg en consequenza dil sgarscheivel incendi dils 11 da fenadur 1822, al qual 15 casas e 16 clavaus cun la caplutta ein stai curdai sco unfrenda, ils dus carstgaunets vegls ein morts, l’in ils 18 e l’auter ils 19 da fevrer 1830. In frar pli vegl dil bab Duri Battesta, Giachen Martin, n. ils 13 da december 1809 e morts ils 19 d’october 1872, ei restaus a Camischolas e fuva sez medemamein pur. Dasperas s’occupavan quels dus intelligents frars en Svizra Bassa e sez leuor’en Germania, senza haver fatg enzatgei scolas, sco surprendiders da construcziuns da straduns. Anno 1860 ei il stradun dall’Alpsu vegnius baghegiaus naven da Mustér entochen ils confins uranes ed il vitg d’Ursera ed anno 1864 ei quel vegnius collaudaus e surdaus al traffic. lls dus frars Berther han giu obteniu dal Grischun e dagl Uri mintgamai ina sort da baghegiar, numnadamein dal vitg Mustér naven entochen S. Brida sut Tschamut giu e naven dagl ault dil pass entochen tier il secund caraun sur Ursera si; quel vegn numnaus aunc ozildi «Caraun dils Berthers» e dals d‘ Ursera «Berthers Kehr». Da lezzas uras han ils frars Berther, che fatschentavan bia luvrers talians, menau la pulenta, la tratga naziunala da lur luvrers, ella val Tujetsch, nua che quella spisa ei senaturalisada extraordinariamein fetg e bein.
Dus mattatschs dil Berther da Dieni haveva Niessegner destinau per la clamada sacerdotala.
Els, sco lur geniturs, han giu dagur da quei clom e capiu quel. Il vegl dils dus frars, il Tumasch, ei daventaus prèr ed ha operau sco tal cun grond success e ventira, specialmein ellas duas pleivs da Surrein e da Medel, quasi entochen sia beada fin.
Il giuven dad els ha studegiau els gimnasis da Mustér e Sviz, allas universitads da Friburg e d’Eichstädt e suenter el seminari da s.Glieci a Cuera. Il giuven Giachen Martin Berther fuva daventaus in oreifer student d’excellenta cumparsa ed el haveva menau si’egliada sur nos tiarms vi e mirau il mund e siu cunfar en tiara jastra.
Statura e figura da gust e parada han qualificau il giuven Tujetschin da maniera ch’el ha fatg sco schuldau en cuort carriera e cun 23 onns fuv’el premlitinent el battagliun navonta. Cun occasiun d’in manever da brigada ha el anno 1882 giu l’occasiun da gastar sia entira colonna a casia enten Dieni. Cuort sissu ha el schau prender sia biala barba brina ed ha brattau la uniforma cun la sutana nera dil seminari da s. Glieci a Cuera. Leu ha el cuntinau ses studis teologics, mo ei lu vonzei sedecidius da snegar il mund dil tuttafatg ed ha supplicau il pader Priur Benedetg Prevost per la recepziun ella claustra da Mustér, la quala il numnau Priur, in religius retic ord la claustra da Muri-Gries, fuva gest sil precint da restaurar cun igl agid da Diu.
lls 16 da december 1884 ha il frater Giachen Martin Berther fatg siu sogn profess ella baselgia claustrala da s. Martin a Mustér ed ha obteniu il num religius Basilius. A siu niev sogn patrun, al grond sogn doctur dalla baselgia, ha el duront sia entira veta rendiu honur. Ils 25 da schaner 1885 ei il giuven religius vegnius benedius ora a Cuera subdiacon, ils 14 da matg dil medem onn a Mustér diacon ed ils 17 da matg spiritual. Sia sontga messa nuviala ha pader Baseli Berther celebrau sut gronda frequenza dil pievel per gliendisdis Tschuncheismas, ils 25 da matg 1885.
Pader Baseli ha giu collaborau gia sco noviz e frater, strusch passaus en claustra, alla scola claustrala ed anno 1888 eis el vegnius tschentaus sco prefect alla testa da quella. Sin quei post ha el perseverau entochen anno 1905. Dasperas deva el instrucziun en scola, sco prefect e suenter en differents roms, sco p. ex. aunc anno 1930-1931 latin all’emprema classa gimnasiala.
Pader Baseli fuva sin scantschala in oreifer oratur e sco grond veneratur da Maria tergeva el la gronda baselgiada, perseverada en profund silenzi en ses priedis dil meins da matg tier e cun sesez ellas aultas sferas celestialas. Era sco confessur gudeva Pader Baseli in special renum e respect, sco el insumma steva tier ses conventuaIs, scolars e tut il pievel en aulta veneraziun.
Siu liber temps dedicava il prefect e professer alla biblioteca claustrala e specialmein als cudischs romontschs ed alla collecziun retoromana.
El ei staus il fundatur e protectur da quella entochen sia mort. Dasperas s’occupava quei um scientific specialmein cun studis local-historics ed il pievel sursilvan romontsch ha d’engraziar ad el in grond diember da talas bellezia lavurs, cumparidas en squetsch. Oravontut alla ton carezada Val Tujetsch, alla quala sias vacanzas fuvan dedicadas entiramein, ha el dedicau deliciusas caussas. Pader Baseli ha era teniu bia sin siu num da famiglia, «da Cha Berchte», «Berchter», Berther, in dils pli vegls e pli vengonzs dalla veglia dertgira aulta dalla Cadi. A quella schlatteina ha el dedicau en sia ovra «Il Cumin dalla Cadi da 1656 e Mistral Giachen Berther» ina impurtonta apologia per giustificaziun dil numnau mistral.
Anno 1898 gia ha il confrater da P. Baseli, igl aultreveriu Sur P. Maurus Carnot, a nus tuts enconuschents sco pli prominent poet e litterat, scret en connex cun siu appreziament digl erudit P. Baseli Carigiet da p. m. en siu studi culturhistoric-litterar: «Im Lande der «Rätoromanen» sur P. Baseli Berther il sequent:
«Il da nus spariu litterat e poet (Carigiet) ha relaschau a P. Baseli Berther per ierta e testament siu num, entusiasmus ed inspiraziun per il lungatg mumma; el figurescha ella Crestomazia cun entginas poesias spiritualas ed humoristicas, allas qualas s’aggiunscha in plascheivel toc prosaic, il qual descriva en moda naturala e tuns caulds e plein colurs sia biala patria, la val Tujetsch, siu pievel e sias isonzas. La circumstanzia, che P. Baseli ha era salvau e scompentau bein enqual cudisch vegl e purgameinas, che fussen schiglioc svani ed i a piarder, sco scazi en sia biblioteca romontscha, dei buca vegnir cuschentada“

Cun amur ha’l cheu ses scazis
Cun mudestiadad ludau;
Sco tresor da nossa claustra
Al visitatur mussau.
(Libramein suenter W. Weber)

Gie nus Retoromans e cun nus era la societad Retoromontscha, alla quala P. Baseli Berther ei restaus fideivel commember entochen la mort, essan obligai al defunct il pli grond engraziament per ils scazis litterars dad el a nus rimnai e relaschai cun nunstunclenteivla premura.
P. Baseli Berther fuva in sacerdot suenter il cor da Diu, e schebein beinduras da sia vischinonza buca dil tut capius ed essend forsa sez era buc adina penetraus cun siu spért ellas intenziuns da quella, perquei ch’ei fuva buca dau agli da sfurzar sesez e sia cavazza tujetschina en mintga patratg ed ideal, sche fuv’el tonaton in caracter schuber sco gl’aur, che vegn honoraus e respectaus da ses veneraturs ed amitgs.
La claustra da Mustér ha piars anno 1931 treis erudits religius ed in bruoder laic entras la mort. Mo la medema claustra sa seconfortar cun il legreivel schabetg, che treis giuvens conventuals, che giustificheschan las pli bialas speronzas, han quei onn pudiu ascender ils scalems digl altar grond per celebrar lur primizias en claustra.
Igl ei a mi buca pusseivel da concluder mia cuorta descripziun dalla veta da nies aultpreziau e venerau pader Baseli, renconuschius ed aultstimaus sco religius, predicatur, confessur e professer, sco scribent, perscrutatur dalla historia locala e litterat, senza allegar ils products da sia plema.
P. Baseli ha en sia gronda modestiadad mai tschercau il laud dil mund ed ei sco humiliteivel religius claustral mai s’exponius sco campiun ni herox als contemporans. Tonaton mereta nies bien P. Baseli da nus laud e bien engraziament specialmein per la ierta a nus relaschada en plaid ed exempel ed oravontut en sia Biblioteca romontscha claustrala ed en tontas numerusas scartiras, dallas qualas jeu vi cheu cuortamein far menziun.“

1. Cun il motto ord il cudisch Prov. 17. 6: «La gloria dils affons ein lur perdavons», alla testa da sia prefaziun dil bi cudischet titulaus: “Baselgias, Capluttas e Spiritualesser da Tujetsch”, ha P. Baseli presentau al pievel tujetschin ina oreifra historia da ses sanctuaris, 13 baselgias e capluttas e 5 sontgets, sco era da siu spiritualesser, v. d. dils spirituals jasters ed indigens che han funczionau ella val sco plevons, caplons e primissaris ord il quendisch e sedischavel tschentaner entochen sin il di dad oz. Grond interess sveglia la secunda part dil bi cudischet, che cuntegn cuortas indicaziuns sur dils «Spirituals nativs da Tujetsch». Denter quels secattan ils avats da Mustér Pieder de Pultengia da Rueras, Adalbert II da Medell da Sedrun, da Florin Gallus da Camischolas ed Anselm II Quinter da Bugnei.
Ella prefaziun da quest cudischet, comparius anno 1924 ella stamparia Theodosiana «Paradis» ad Ingenbohl, scriva P. Baseli sez: «Nossa lavur porscha mo fragments, notizias, cunzun quei che appartegn l’entschatta. Sper nossas lavurs da mintga di, essan nus sedai onns ora tutta breigia per rimnar nossas notizias. Igl ei stau ina tgeua, plascheivla occupaziun. Nus havein encuretg e rimnau nua ch‘ igl ei mo stau pusseivel. En particular ei quei daventau egl archiv episcopal ed egI archiv dalla pleiv».

2. Vegn onns avon ch’il sura menzionau cudischet compari ha P. Baseli schau squitschar a
Mustér sut il tetel «Sin Cadruvi» sias reminiscenzas ord la Val Tujetsch cun illustraziuns. Quella lavur cuntegn ina partida fetg bialas discripziuns ed historiettas historic-culturalas, las qualas han uss gia e specialmein per il temps futur muntada ed interess cun risguard dalla populaziun e ses agens tips, sco era da pastiras ed alps cun la veta che regia sin ed en quellas.

3. II cumin dalla Cadi da 1656 e Mistral Giachen Berther.
In niev document per la historia dalla Cadi cun notizias. Mustér, stampa da Giusep Condrau, 1911. En quei oreifer studi historic ha P. Baseli Berther rehabilitau vengonzamein il sura numnau Giachen Berchter che era staus calumniaus dis ed onns ella «Synopsis» dalla claustra e «Cuorta memoria» da quella sco inimitg dalla claustra. Da mistral Giachen era quei vegniu pretendiu en quella scartira e suenter d’auters scribents. La stad d’anno 1909 ha P. Baseli finalmein anflau in vegl e fetg impurtont document, il qual el ha fatg stampar exactamein en sia sura menziunada lavur historica. P. Baseli muossa eclatantamein, che tut quei che era vegniu pretendiu e palesau sur da mistral Giachen Berchter e dil cumin d’anno 1656 ei buca ver, ei semuossi anzi ord quei document che «mistral Giachen Berchter ei adina staus in bien amitg e fautur dalla claustra e che las bullas da Urban VIII ed Innocens X seigien gnanc stadas sin Cumin». Ei sappi buc esser raschieni, che mistral Giachen Berchter hagi tagliau en tocs quellas. Era eis ei mussau si, ch’il numnau mistral seigi buca, sco «Synopis» e «Cuorta memoria» pretenda, vegnius en miseria, pupira e dishonur, anzi, ch’el seigi vivius ses davos onns en bunas, ni silmeins buca schliatas relaziuns finanzialas e ch’el seigi morts sco officier e bien cristifideivel a Valencia en Spagna, honoraus e respectaus da tuts.
Ella historia dil cumin dalla Cadi da 1656 secattan sper las interessantas notizias sur dalla veglia schlatteina Berther era aunc per nus Sursilvans marvegliusas menziuns sur da duas autras marcantas persunas sursilvanas da quels onns, numnadamein sur dil domdecan Mattias Sgier e landrechter Clau Maissen.

4. «Selva avon 100 onns». Notizias culturhistoricas ord la val Tujetsch da P. Baseli Berther.
Igl autur descriva cheu meisterilmein la cuntrada, il pievelet che viveva en quella a Tschamut e Selva, sias lavurs ed isonzas, ses prighels, sgarschurs e temas, che smanatschavan en lavinas e bovas e malsognas contagiusas. El caracterisescha ils differents caplons e scolasts, ils purs e lur dunnauns, lur far e demanar en casa ed en baselgia, sil funs ed en nuegl. Snuezi fa la descripziun dalla sgarscheivla lavina dils 12/13 da december 1808, che ha raffau 25 persunas ella freida mort.
Perquei contan ils da Selva aunc oz il di tier lur Mumma digl Agid:

Surtut o Mumma teidl’il riug,
Dils habitonts cheu en quest liug,
Che han quei tempel baghegiau
E quel a ti cheu dedicau.
Da prighels da lavina
Pertgira nus rughein!
Sin tiu agid adina,
Nus fermamein seschein.

5. Notizias sur ils zenns da s. Gions a Mustér.
Mustér 1919. Quellas notizias cumpeglian ils onns da 1643/73 entochen 1918. Igl emprem zenn grond ha stuiu vegnir culaus gia anno 1686 per la secunda ga. Anno 1799, ils 6 da matg, ein per consequenza dil grond incendi occasionau entras ils Franzos tuts ils zenns da s. Gions luai muort la stravaganta calira. Anno 1821 ein ils novs zenns vegni culai a Mustér egl encarden settentrional dil santeri. Anno 1822 gia ei il zenn grond puspei sefess ed il medem meister Monzini da Bergamo ha stuiu cular quel per la secunda ga. Anno 1877 ei era quei zenn puspei sefess ed in niev ei vegnius culaus a S. Pieder dalla firma Grassmayer. Il niev zenn, che ei, sche jeu sbagliel buc, vegnius culaus ad Aarau, ed ei fetg bein gartegiaus, ei adina aunc en funcziun. El ei vegnius tratgs sin clutger per Nossadunna mars, ils 25, ed ei vegnius tuccaus per cass da mort l’emprema ga ils 7 d’avrel 1918 a mia cara mumma, Fausta Disch, n. Berther da p. m.

6. A Camischolas. Notizias cultur-historicas ord la val Tujetsch. 1917. Particulara attenziun schenghegia P. Baseli en sia deliciusa scartira alla plascheivla caplutta, dedicada a s. Onna. Lura alla preziada famiglia Deflorin cun siu avat Gallus ed al grond barschament che ha arsentau il vitget per s. Placi 1822 per gronda part cun la caplutta e duas persunas femininas.

7. Sontga Catrina a Mustér. Marvegliusa ei era la historietta da quella capluttetta denter las 15 baselgias e capluttas sin territori da Mustér. Ella appartegn tut suletta ad ina famiglia privata e P. Baseli raquenta en agli atgna, biala maniera in bien ton sur dils possessurs da quei bufatg tempelet sper la punt ed al pei dil Muntatsch.

8. lls Bannaherrs dalla Cadi, cun notizias ord la historia dil cumin dalla Cadi. 1920. Cun quella biala lavur historica ha P. Baseli carmalau neunavon, ton sco ord mort en veta duas bandieras veglias dil cumin dalla Cadi, che parevan d’esser quasi svanidas e stulidas per adina. Ellas ein ussa restauradas e vegnan tratgas en honur tier specialas festivitads, D’impurtonza ei la raquintaziun, d’organisaziun e constituziun dil vegl cumin dalla Cadi. Sur tut s’interessescha mintga vischin dalla biala historia dils schinumnai «Bannerrherrs» ni banderols, che vegnevan designai dal pievel sez e tschentai en quella aulta dignitad per mintgamai, liungas periodas.

9. Avon onns da P. Baseli Berther e 10. Reminicenzas d’in vegl curant da Mustér, dil medem autur, ein dus oreifers studis, stai compari ella «Gasetta Romontscha» e mess al pievel silsuenter en disposiziun sco separats.

11. Il tschundubel Scapulier ei vegnius scaffius gia 1890 a Nossadunnaun tier Benziger e Co. Il pign, mo bufatg cudischet cuntegn las bialas historias dils 5 differents scapuliers cun in appendix d‘ oraziuns vitier.

12. Gest aschi bialas ed edificontas ein las Remarcas da P. Baseli sur la schinumnada «Corda paternos» digl uorden dalla s. Crusch, cumparidas 1916 a Mustér en duas ediziuns.

13. Anno 1916 ha P. Baseli scret per la «Confraternitad da Maria Regina dils cors» la biala dedicaziun a Jesus Cristus, l’incarnada Sabientscha entras Maria.

14. In’autra biala Oraziun ei quella per unfrir si a Diu tuttas s. Messas, da recitar la damaun.

15. Oraziun en temps d’uiara, stampada a Mustér cun lubientscha episcopala 1914. Il. ediziun.

16. Speciala menziun debitein nus al bi cudisch «Pren mira, tiu Retg vegn tier tei!», stampaus a Mustér gia anno 1887.

17. Il «Cudisch da messa per pietus affons». Quel ei vegnius squitschaus a Nossadunnaun 1903 e 1922.

Lura vuless jeu era buc emblidar:

18. «Il spazzatgamin», cumparius anno 1896 ellas Annalas e finalmein igl oreifer studi cultural

19. Sas era nua Giuf ei» I. tom dalla Crestomazia 1896.

Tgi che ha enconuschiu P. Baseli, sa ch’el ha luvrau, sco rev. P. Maurus ha scret ella Gasetta Romontscha dils 31 da december 1931, entochen ch’il sulegl da sia veta fuva per ir da rendiu. La mort da siu frar sacerdotal ed original, sur Tumasch, ha sfraccau sias forzas, sco sch‘ il sur frar havess detg ad el: Nos geniturs e tuts tes fargliuns ein ussa i a casa, neu era ti, sco il pli davos, ti has luvrau e scret avunda.
Tgei che P. Baseli Berther ha luvrau e scaffiu per siu pievel, per scolars e students, tgei ch’el ha mess neu tut per la veglia cultura retica e siu manteniment, hai jeu mo saviu indicar. Ussa ruaussa il nunstunclenteivel da sias fadigias suenter ina veta luvrusa e pazienta, che ha purtau custeivels fretgs e vegn aunc ditg a schar tals madirar vinavon.