Brevs da condolientscha
Brev 01 __________________________________ AcT Sc 106
Schwyz, ils 26 V 1951
Car tat e cars tuts,
Haiel grad retschiert la tresta nova ch’il Segner hagi priu si tier el nossa buna tatta. Lessel haver condolau a Vus cordialmein ed ei ha era fatg a mi fetg mal, quella tresta nuviala. Per mei ei buca pusseivel da vegnir si la sepultura, aschi bugen ch’jeu vegnessel era. Persuenter aber viel jeu seregurdar dad ella ton pli savens en mias oraziuns, sco quei ch’ella ha fatg l’entira veta era per nus tuts. Ella ha ussa gudignau e vegn era a seregurdar da nus ton pli fetg enta parvis.
Tgei quitaus, e con bien ella ha fatg cun nus, gliez sa mo Niessegner ed el vegn a remunerar ella persuenter.
Tgi havess detg ch’ella mondi aschi spert tier Niessegner cura ch’jeu haiel viu ella la davosa ga. Ella ei aunc vegnida cun mei ora sin scala ed ussa eis ella schon en bara. La veta varga e va.
Aunc inaga lessel haver condolau da cor a Vus car tat e seregurdar dalla cara defuncta en mias oraziuns.
Vies Felici
Brev 02 __________________________________ AcT Sc 106
1951
Preziada famiglia en malencurdada!
Quei mument endrieschel che la buna consorta e mumma seigi morta e condoleschel dacormein. Tgi havess detg cu jeu sundel stada leu ch’ella fagess aschi spert. Mo sundel propi leda che haiel fatg quella viseta e dau ina paterlada. Ella ha gudignau, mo grev vegn ei ad esser per il mariu dad esser ussa persuls, senza la camerata dalla veta. Ei sedi, pli vegls ch’in vegn e pli basegns ch’ins ha in di da l’auter ed igl ei franc aschia. Denton sundel segira che Felici e Helena vegnien a haver bien quitau per il car bab. Alla cara defuncta vegli il bien Diu a dar la pagaglia per la buna veta da lavur ed oraziun, e possi ella era seregurdar da nus, che havein eunc da semudergiar empau en quella paupra val da larmas. Jeu sundel savens cun mes patratgs sin fossa da nos cars, cunzun miu car frar Hans ei adina avon ils egls. Mo els han segir meglier che nus. Viel era seregurdar da Vossa cara defuncta e salidel tuts cordialmein
Vossa onda Fausta e affons
Brev 03 ___________________________________ AcT Sc 10
Benken, 27-5-1951
Stimada e cara famiglia en malencurada,
Gl’ei per mei in basegns d’admetter a Vus tuts mia sincera condolientscha. Il Segner vegli far grazia ed esser in migeivel derschader cun la buna Maria ch’ei finfatg stada allerta e pinada per il davos comiau. Nus lein seregurdar dad ella.
Vies attaschau Ludivic Hendry
Brev 04 __________________________________ AcT Sc 106
Cuera, 29.V.51
Signur president!
Stimau Gion Felici!
Alla mort da Vossa cara consorta exprimel mia cordiala condolientscha e seregordel bugen da sia olma ella sontga messa. La sontga speronza sil seveser ella megliera veta dat forza da purtar las emprovas e cruschs dil viadi terrester.
Era jeu sun staus sigl ur dalla fossa. Ei va ussa empau meglier, mo aunc buca en uorden.
Cordials salids
Sur Benedetg, vicari general
Brev 05 __________________________________ AcT Sc 106
Preziada famiglia en malencurada!
Il Segner ha clamau nies bien Felici. Dieus hagi si’olma! Jeu vegnel dad uss naven ad includer el en il memento della sontga messa ed ellas oraziuns. R.I.P.
Allas preziadas famiglias exprim’jeu mia sincera condolientscha. Deplorablamein saiel buca vegnir suenter bara; nus havein tscheu sepultura. Cun respectus salids!
Sumvitg, 13.X.54
Gion Battesta Sialm, caplon
Brev 06 _________________________________ AcT Sc 106
1954
Stimada famiglia Monn!
En profunda tristezia dalla sperdita da Vies carissim bab e miu preziau amitg admettel jeu a l’entira famiglia mia sincera condolientscha e vegnel a tener il preziau defunct en infinita memoria. Per il salid da sia olma, laschel jeu leger in per messas, cun seregurdar dad el en nossas oraziuns. Cun attaschadadad, salidel l’entira famiglia.
Lucas Berther
Rüschlikon/Turitg
Brev 07 _________________________________ AcT Sc 106
Cuera, ils 12 d’october 1954
Stimada famiglia en malencurada,
Cun caschun dalla mort da signur Gion Felici Monn, cun il qual jeu haiel giu la ventira da conversar differentas gadas ed il qual jeu haiel astgau emprender d’enconuscher sco in Grischun da bien maguol, selubeschel jeu d’exprimer a Vus mes sentiments da sincera condolientscha.
Cun perfetga stema salida
Dr. iur. Donat Cadruvi
Brev 08 __________________________________ AcT Sc 106
Stimadas famiglias en malencurada,
Cun caschun dalla mort da Vies carissim bab e tat admettel jeu a Vus mias sinceras condolaziuns e l’expressiun da viva part a Vossa malencurada. Il preziau defunct resta en memoria a tuts quels che han enconuschiu el sco in um da tempra grischuna e romontscha, in um d’in cor e patratg serein e d’in caracter dad aur. Ei fuva mintgagada in plascher d’entupar el e da ver cun tgei clara e franca egliada el surveseva ils problems dil temps e dalla veta e co siu cor batteva per ils fatgs da nossa patria pli stretga e pli largia.
Aschia rest’el en nossa memoria.
12.10.54
En viva part S. Loringett
Brev 09 __________________________________ AcT Sc 106
Gams, ils 13-10-54
Stimadas famiglias en malencurada,
Mia sincera e profunda condolientscha per la sperdita da miu car padrin.
Deplorablamein hai jeu enderschiu da sia mort per il mardis tard la sera, essend jeu ius quei di cun mia poppa a Cuera el spital. Vessel stuiu vegnir la mesjamna gia dallas 4 ½ naven da Tumegl per esser leu silla sepultura. Cunquei ch’jeu hai da far pir che mai cun mia atgna sanadad, hai jeu buca saviu sedecider da vegnir. Vess jeu survegniu novas ad uras e buca stuiu far extravaganzas, vess jeu senza auter priu part dalla sepultura.
Trend en consideraziun quels facturs, sperel jeu che Vus capies mia absenza e perstgiseies mei. Vegnel tschelluisa a seregurdar da sia olma.
Gentilmein salida tuts ensemen
Felici Hendry