La tatta ed ils laders 2006

La tatta ed ils laders
Project da teater sco finiziun digl onn da scola

(ico) Venderdis, ils 16 da zercladur ein ils aspectaturs en sala da scola a Sedrun sediverti cun la cumedia criminala «La tatta ed ils laders», ina sala pleina che ha saviu rir da cor.
Igl ei buca sempel d’anflar in toc che corrispunda al scalem dils giuvenils ch’ein sil precint da finir lur onns da scola en vischnaunca. Quei ei denton reussiu als scolasts Vigeli Jacomet e Norbert Vinzens. Hubert Venzin ei segidaus cun la reschia, scolast Ervin Cathomas ha fotografau. Tals projects ein fretg da collaboraziun e ligian scolars ed educaturs. Igl ei reussiu d’engaschar ils giuvenils cun tgierp ed olma. Lur plascher da far teater fuva evidents e las risadas dils aspectaturs, ils applaus spontans han mussau che lur lavur hagi anflau accoglientscha. Gnanc in flot tgaun che fuva era actur ha saviu distrer l’attenziun dils aspectaturs.
La musica — cantada engles, ton dalla solista sco era dil chor dils acturs, corrispundeva, sco era il toc, perfetgamein al scalem da vegliadetgna dils giuvenils. Ina biala prestaziun cun bia lavur e premura davos las culissas.