La mustga africana 1995

Teater a Rueras
La mustga africana
Igl enconuschent e stimau poet popular Rolf Gordon ha scaffiu en quei toc entginas figuras che han dapi onns fascinau e fatg rir ol publicum. Nossa cumpassiun rendein nus oravontut a nos dus tribulai herox d’aventuras. La cumedia raquenta il prigulus mo surtut era il victorius cumbat pervia dalla pussonza dallas clavs. Per il meister calger Mattias ha in amitg ina idea grondiusa: enzanua en in cudisch hagi el legiu inaga sur d’ina malsogna da durmir che derivi neu dall’ Africa. Mattias dueigi dar da crer als ses ch’el seigi infectaus da quella malsogna maligna (che provochescha denter auter era il somnambulissem) per saver ira ruasselvilamein la notg vi ell’ustria dalla Cruna.
Mo buca tut va tenor plan e Mattias ei sfurzaus da giugar il malsaun era lu, cura ch’el manizzass il pli bugen tut manez e marsialas. Era gia suenter sia emprema excursiun alcoholica sto el veser en che l’ustria ei buca senz auter la summa dil cletg viril. Co Mattias e Balzer acquistan tuttina aunc la ventira matrimoniala e lur libertad sperein nus da saver mussar a Vus en ina u l’autra da nossas representaziuns ella sala da scola a Rueras.
A tuts dalunsch e damaneivel fagein nus in cordial beinvegni. Cun quella caschun vulein nus admetter inaga in sincer «engrazia fetg» a nos fideivels aspectaturs che prendan adina puspei peda per assister a nossas cumedias.
«La mustga africana» vegn representada tschun ga a Rueras, numnadamein ils 16, 21, 23, 28 ed ils 29 d’avrel 1995 mintgamai allas 20.15 uras. Cumpignia da teater Rueras

Teater a Rueras
GA. Igl ei quei ina cumedia e che ha da far cun ina mustga africana, ella Val Tujetsch bein plitost ina specia rara, tuttavia muort las temperaturas actualas.
Denton quei ei stau negin impediment per la Cumpignia da teater da Rueras da preparar tier e dar quella cumedia il proxim temps, e co ei dattan ella! Cheu saveis Vus rir puspei inagada da cor e sedelectar vid las ideas ed invenziuns dils giugadurs che dattan tutta breigia e capeschan da sluccar aschia il rir da cor a finadin, perfin larmas vesan ins a ruclond, beincapiu era dil rir.
Perfin per il tuchegiar duei il rir haver in bien effect, bein raschun avunda da far il viadi a Rueras suenter quels dis da fiastas. Stimai amaturs dil teater, sefagei si, mussei il dies alla televisiun e vegni a teater, e Vus vegnis a veser che da quels spitachels dat ei mo sin tribuna e quei schizun live e cun maletg grond.
La cumedia sespleiga en treis acts ed ei scretta digl enconuschent poet Rolf Gordon cun la versiun romontscha da nies buca meins enconuschent regissur e giugadur Hubert Venzin.
i.a Cumpignia da teater Rueras sa segir grau persuenter sche numerus amaturs dil teater vegnan a mirar quella biala cumedia ed els selegran sin Vossa viseta.
Pia tut tgi che ei buca aunc stau, stei si, vegni e tedlei e Vus veis lu fatg in plascher a Vus ed a nus. Giavischond tut bien e sin seveser, salida Vus la Cumpignia da teater Rueras.

…………