Unviern 1951

Avon 65 onns – igl onn dalla neiv gronda
El relasch da Gion Antoni Venzin da Rueras (1896-1962) hai jeu anflau ina lavur sur digl unviern 1951. El ha nudau ils eveniments dall’entschatta dil unviern 1951 sin sia moda, sco el ha udiu, viu e sentiu. Igl ei in document autentic nudaus ils 20 da fevrer 1951, pia cuort suenter ils eveniments tragics. „Igl onn dalla neiv gronda“, quei num ei francaus ellas generaziuns da lu. Grondas parts dil cantun Grischun han quei onn pitiu dalla neiv e dallas numerusas unfrendas.

Il cronist Gion Antoni Venzin ei il fegl vegl da Paul Giusep Venzin (1870-1926) e Maria Margheta Peder (1872-1908). El ei carschius si ensemen cun in frar e quater soras. El ei staus ledis ed ha fatg il pur ensemen cun treis soras, l’Onna Maria (1898-1965), la Mariuschla (1904-1982) e la Ludivina (1906-1973). Gion Antoni ei vegnius malsauns e schiraus dallas combas ed ha ils davos 14 onns mai bandunau sia casa. Per la cuminonza eis el staus quater onns ella suprastonza communala (1929-1932). El ei igl autur da pliras lavurs. El ha fatg ina resumaziun dils protocols da vischnanuca e rimnau ils nums dils ufficials da vischnaunca. El ha scret: Il fil dat teila, ina skizza culturala; Las alps da Tujetsch; Enzacontas expressiuns romontschas egl Ischi 1962; Caltschina viva; La talpa; Currellas d’in cavrer; Giustia sil plaz, ina scena tuatschina; Il barschament da Selva; Lavinas e disgrazias gl’unviern 1951; Notizias sur dalla famiglia Venzin; Survesta dils capitanis da mats Tujetsch. Siu relasch litterar, ses manuscrets ed auters documents sesanflan egl archiv communal.

Lavinas e disgrazias gl’unviern 1951
da Gion Antoni Venzin, Rueras
(elavurau e redigiu da Tarcisi Hendry)

Gl’unviern ein vegnius tier nus circa miez november 1950 cun ina pli grossa cozza da neiv ed ils suandonts dus meins eis el staus sut reschia dil favugn. Mo paucs dis eis ei stau pli freid. La bunaura e plievgia promovan la scadenza da neiv e quei sebratta giu zacontas ga.

Schaner 1951
Da miez schaner pudeva ei esser in bien meter neiv. La plievgia ed il freid sissu vevan fatg crusta cun la neiv, tuttavia da maun sura.
Ils 18 da schaner 1951 ha ei puspei entschiet a never e cuntinuau ils 19 ed ils 20, buca aparti, mo constant, di e notg. Ei fuva plitost ina neiv grula, da lavina, che sempluneva cun quei ch’ei neveva mo sco ordinari. Ins entscheveva a far da tuts patratgs. Il venderdis sera, ils 19 da schaner, ei da circa las 4 e mesa la Pulanera vegnida giu da mintga vart e sfraccau las petgas dalla viafier ed ida tochen giun Curtin. La viafier ha naven da quei di stuiu calar sia cuorsa sur cuolm, mantenida tochen ussa. In per perveseders sin via han pudiu mitschar en Dieni. Il caplon da Selva, sin via da Parvechel en, ha pudiu turnar anavos. El ei suenter ius viaden cun la posta da cavagl. Era l’Ondadusa fuva en quei interval vegnida giu empau. Dalla Val Mila vev’ins era nuota bien saung, ils cussadents da Parvechel fuvan sbrigai giu el vitg.
La notg sin la sonda, ils 20 sils 21, ha ei tutta notg neviu e magari aunc cuflau. La damaun pudeva ei esser 1.60 – 1.70 neiv. Ils perveseders odentuorn mavan nuota a perver cun bien saung.
Entuorn mesa las nov, ei neveva, mo fuva buca aparti stgir, audan perveseders a sfraccond lennas sigl Uaul Liez. La lavina era rutta ora sigl ur dil Plaun Liez. Mo era sils Bruis fuva ella vegnida giu atras enado. Quella digl Uaul Liez ei rutta giu atras e da Rieven Ault e Budas giuado, ha sdernau treis faners, in sin las Brahas, il clavau dils Monns en Clavautgiet, ils faners da Craps ed era ils faners giusum da Mulinatsch Sut ha ella runau en la Rufna. A Plaun Sutè eis ella dada digl iral dil clavau dils Alexis en. Il Gion Fidel Berther-Cavegn che perveseva leu e pinava si el ladretsch, cu la lavina ei dada digl iral en e da falla giu. El ei lu revius sin tetg per dar sinzur sch’ei fuss forsa vegniu en zatgi leu el contuorn. Il Gion Battesta Giossi pli anorasi, veva sentiu nuot. Quei muvel han ins lu midau, essend era rut en la palaunca dil nuegl. Sil Cuolm ed era a Milez, Greps e Rivas era rut ora la lavina ed iu giu la notg tras enado. Duess esser iu cun treis baghetgs sin Rusas e zacons faners sur Tschamut. Il baghetg dalla staziun e la villa Bernasconi ein scuai naven. La sala dil hotel ei sfraccada en.
Era la Val Bugnei ei vegnida giu snueivel tochen Rein e sfraccau zacons baghetgs.
Vitier tier sera, ei fuva neviu tudi, ei vegniu pli bunaura e plueva denteren. Quella midada da temperatura ei sco adina il pli critic mument. Las lavinas aunc pendidas vegnan ussa libras. Entuorn mesa las 5 rumpan ora las lavinas dil Tgom, Plaunmiez e la Val Vallatscha, mo nuota extra ferm. Temprada la neiv, ein quellas lavinas buca aschi furiusas e prigulusas sco quellas da freid. Il telefon da Selva fuva interruts e funcziunava mo la lingia Planatsch-Tschamut. A Selva dadens il vitg era vegniu giu la notg e vitier sera la Val Ruinatsch ed ins quintava a Rueras ch’ins seigi leuen ad interim ord il prighel e panzava plitost encunter la Val Mila. Pli tard vi mavan denton da tuttas patarlas pil vitg entuorn, il Paul Benedetg Venzin duessi esser vegnius en la lavina, seigi liberaus mo hagi rut in bratsch. Dallas 10 vegn pari el radio pli schliatas novas da Selva. Ins leva quella sera da certas varts, augsegner e parents, buca schar saver la famiglia Giossi, muliners, la sgarscheivla nova da Selva. In siu parent che ha era radio, va quella sera aunc cun la nova ch’il Gion Giusep seigi vegnius en la lavina cun la casa dil Toni Loretz.
A Selva vegneva ei a vargar ils dus meters, semplunada denter las schermas e pertut ed era schluitada in per gadas denter las casas giuado. La punt fier dalla viafier fuva derschida giuado suentermiezdi. Il Paul Benedetg era circa las 4 e mesa ius en siu faner circa 2 meters dadens casa a pinar si fein da cauras. La lavina vegn e stauscha il faner ed el in toc giuado en la neiv. Ils emprems patratgs ein stai vid la famiglia, manegiond che la casa seigi forsa era ida.
Lu sto el seperschuader da sia situaziun e sepreparar da murir. Sia dunna ed il buob grond eran allerta avon casa e vegnend la lavina seglian els en casa e la dunna po buca serrar igl esch che la neiv ei sils calcogns tochen en stiva, il buob era siglius da tschaler en. Vonzei auda il Paul Benedetg a mond siu buob grond da 9 onns, a grend sur la neiv vi, mo il buob po el buca susentar. Remarcabel ch’ins auda fetg vess ensi ord la neiv, ferton ch’ins auda tgunsch engiu. Cun in moni ch’el veva aunc pudiu tschappar, vegnend scuaus naven dalla lavina, po el far liber in tec il tgau ed il pèz. Il buob va lu si el vitg a grend ed in per femnas ein spert dadas sissu e liberau el. Empau mal in bratsch mo pigl auter en gamba.
La glieud en temas e fetgas saveva buca tgei pigliar a mauns. L’Ursulina dil Toni Loretz, era quei mument ida tier la Ludivina dil Giusep Giger per petroli, essend l’ovra electrica da Tschamut total disfatga. En quei mument vegn la lavina puspei senza bia canera. Sevulvend entuorn dil la Ludivina: „Vossa casa ei naven!“ La Ludivina veva grad avon detg si per l’autra. „Vossa casa ei silmeins segira!“
Il Gion Giusep che luvrava enzatgei da scola en stiva ei svanius cun la casa ch’era tut en scalgias tochen giu Rein. Era la punt fier era ida e quella sul Rein era en quei mument.

Il Gion Giusep (1918) fuva suenter differentas scolas, la reala e mercantila, la finala sedecidius da vegnir scolast. El veva fatg igl examen il zercladur vargau e stuiu surprender la scola vacanta da Selva. Ils scolars da Selva ludavan el sco per regla ils novizs. El luvrava cun tutta energia. La sonda vevan ins buca astgau ira a Sutcrestas a far scola e veva era buca astgau vegnir ano, mo il Gaudenz Loretz che veva aunc ughiau. ll Gion Giusep fuva el cuost tier il Toni Loretz che veva maridau l’Ursulina Deflorin avon in per onns, mo havevan negins affons. Gl’augsegner, sur Schuler, fuva pauc avon staus tier el e vuliu far vegnir enasi tier els, silmeins la notg, ch’el veva dau plaid. Lez haveva era leu siu bab da varga 90 onns. Il Gion Giusep temeva e scheva ch’el lessi nuota murir enta Selva. El fineschi aunc quella lavur epi vegni el enasi. Ils perveseders eran vid il perver, era il Toni. Il baghetg dil Giusep Giger ei era sfraccaus en quei mument ed in per casas in tec stuschadas. Dil Gion Giusep ei d’anflar nuot, era buca cul tgaun dil caplon. Denton neveva ei vinavon ed era stgiraglia e da far nuot ordaviert, aunc sch’ei fuss stau segir. Gl’augsegner e tut era tementau ed han passentau la notg cun 17 persunas en in nuegl enagiudem il vitg. Quei seigi stau ina pli sgarscheivla notg che quella dil fiug avon in onn e miez. Dil fiug savevan ins fugir e saveva vegnir gidau, dalla lavina savevan ei ni fugir ni vegnir gidai d’enzatgi. Spitgar, spitgar sin la mort, sco Niessegner vul.
La dumengia damaun, ils 21 da schaner, ei in tec pli clar cull’aura, mo ei neiva aunc adina. Tgi che fuva da peda ei semess vid la lavur d’encurir il disfortunau. Denton arrivan colonnas d’agid da Rueras, Sedrun e Mustér. Entuorn las 8 e mesa han ins anflau el circa dus meters sut casa. Il giuven Pally da Medel, che luvrava da fravi a Selva, ei daus sissu gl’emprem. La suppia ed il cudisch sper el. Denton vegn el buca ver giu da pitir ditg. In per nauschas fridas el tgau ein stadas sia mort.
Finida la messa a Rueras entaupan la glieud a vegnend sin ina schletta cun la bara orda Selva. Ei fuva igl onn dapi che nus vevan stuiu dir ils 5 paternos suenter priedi „per quellas mattauns che van a saltond las dumengias ….“ che veva dau ton da resdar. Mo per regla ston ils innocents satisfar per ils auters. Ina veta plein speronzas veva finiu aschi spert.
Il mardis ei stau la sepultura cun in conduct da pievel strusch viu tier ina sepultura. Curonta scolasts e nov tschupials, in era dil Chor da baselgia da Rueras, ch’el fuva commember ed han era cantau ina canzun sur fossa.
La mesjamna avon vevan ils mats da Rueras giu Tscheiver general. En siu plaid veva il Gion Giusep detg: Ier sundel staus a nozzas a miu figliel, Cristian Berther secasaus a Landquart, questa sera fetschel tscheiver, damaun mondel a conferenza a Sumvitg, tgei che vegn aunc suenter saiel buc! Tgi vess sminau?

Fevrer 1951
La bun’aura ha adina cuntinuau e traso puspei vegnida cun neiv. Ils 3, 4 e 5 da fevrer neveva ei puspei da gust, denton plitost en plievgia e buca ruchiau da num. A Selva fuva quei gleiti avunda sin las temas tenidas ora. Il caplon da Selva scriva el Tagblatt nr. 36 dils 5 da fevrer ina liunga correspondenza. Otg dis pli tard ei turnau a never pli che mai. Mintga ga la dumengia neiva ei. Ils 13 ei aunc rut giu il crest sut la plontaziun tochen uss restaus leu. Quei crest fuva tochen ussa adina staus il schurmetg dil vitg da vegl enneu, mo cuviera ussa aunc quei en 3 casas, quallas dil Sep Lurenz Venzin, dil Giachen Antoni Deflorin e dils artavels Gion Martin Peder. Quei fuvan suloms da vegl enneu quintai per segirs. Il Toni Loretz veva, suenter che sia casa era ida, priu si la casa dallas Gionmartinas. Da siu uorden veva els anflau la scaffa fier, mo vevan schau ir a piarder la clav, in lenn cun aunc si il vestgiu, in fest ligiongias ed ina schetta carnpiertg.
Ils 13 e 14 da fevrer eran tuts spir fetgas e temas e telefonavan tudi al president e levan saver tgei far. Vegnend la situaziun traso pli critica manevan gleiti tuts en dus nuegls, deno il Gion Battesta. Ina damaun ha igl augsegner perfin fatg messa en nuegl. Suenter eis el denton sefidaus da puspei far messa en baselgia. Sil di schevien ei tudi rusari en nuegl.
La neiv era denton semplenida sin 2.70 – 2.80 a Selva, a Rueras sin 2.40 – 2.50 m. Il mardis, ils 13 neveva ei traso empau. Ils 14 ei vegniu tarmess dalla suprastonza ina colonna per gidar ad evaquar Selva. Quei di era lu era dau in tumult. La regenza veva, carschend la neiv tuttavia en las vals entuorn il Gottard, visau las suprastonzas d’advertir la populaziun en situaziuns prigulusas da lavina.
En Tujetsch fuvan las casas en prighel vegnidas evacuadas. A Sedrun eran las casas dador la casa dil fravi vegnidas evacuadas. Ils da Zarcuns han ditg stuiu ira vi Camischolas a maner. A Rueras midavan ils cussadents da Parvechel, Suloms, sut baselgia e Surgiassa (Toni B.) schon beinenqual notg. Quei di vegn era telefonau en da visar, denton ei aunc vegniu fatg ora la patarla ch’ins vegni cun helicopters e sieti per far vegnir giu las lavinas e perfin ch’ins porti naven ils da Selva cun helicopters (tut fama!). Basta, in um va a Rueras casa per casa, quellas dadens la fontauna e 3, 4 casas sisum il vitg e communichescha ch’els hagien ton pli spert da sbrigar. Enqual ga vess quei dau ina lavuruna da far midar casa. Tenor pader Placi a Spescha fussen mo quarter casas segiras da lavina a Rueras; ils calgers Cavegn, Lucas Cavegn, ils Pauls Venzins e Sep Maria Giger. Da quei vegneva paterlau. Dil temps da pader Placi fuva l’ustonza buca aunc construida. Dallas nov entscheiva ei a vegnir glieud cun hontas e pentels, tastgas tut en corda quei che la stretga via pudeva trer dil vitg ora. Nus havevan l’onda Margreta e tut sia famiglia, nov dels. Il Placi, in tec s’entardai, eran stai giusut tiel Giachen Antoni, sis dels. Ei neveva era quei di tochen vitier sera ed era giuaden ina tschaghera. Intervegnend ils motivs da quell’anetga emigraziun, ei semussau che quei dils helicopters era nuot e l’auter steva sura a mintgin – igl ughetg. In tons ein schon i a casa a far gentar, ils nos han fatg e gentau avon che turnar a casa. La sora Catrina ed ils pigns ein aunc vegni a maner tier nus ed aunc biars dils evacuai han durmiu pil vitg odem entuorn. L’aura ei in tec sesferdada ed il prighel vargaus.
La Val Bugnei fuva era vegnida giu da s.Bistgaun (20 da schaner) e scuau giu dus mises ed uaul ed ida tochen Rein. En tut duei la lavina esser ida ella val cun da quei da 25 baghetgs. En Pardatsch ei pari scuau giu tut igl uaul dadens las Ruinas (Barschaus).
Ils habitonts da Selva ein vegni evacuai ils 15 da fevrer entras ina colonna d’agid e da nos umens, tgi cun skis e tgi cun canadiers vi la punt e da Plaun Ault ora ed o l’aua Nual e vi Carmihut, tratgs magari cun sugas. Las Vals fuvan sco ina preit nunpusseivla da traversar. Il caplon cun vegls, il Gion Antoni Peder e sia dunna la Tina Riedi, Taliana, il Sep Maria Albin e plirs malsauns etc. ein vegni evacuai. La glieud ei plitost setratga a Camischolas e Sedrun. Il Gion Antoni Peder, il Sep Lurens Venzin etc. ed empau buobanaglia ein stai a Rueras.
Leuen ein aunc restai circa diesch perveseders cun la Barla Giger-Hetz e la Tonia Riedi a Tschamut.

A grandine et tempestate libera nos Domine
20 da fevrer 1951