Cavalcaster 1971

Teater a Rueras
Il teater romontsch, avon paucs onns aunc actuals en biars vitgs sursilvans, piarda pli e pli sia derasaziun e per part era sia attracziun, ch’el possedeva inagada. Nus lein buca intercurir pli detagliadamein ils motivs che han menau a questa situaziun. Segir ha era la rapida expansiun dalla televisiun influenzau quei svilup. Ella remplazescha per biars il teater, aschia ch’igl ei fetg grev, d’aunc anflar enzatgi che ei promts da sez porscher al pievel ina producziun.
Tonpli eis ei d’admirar quels che han aunc l’energia e la curascha da presentar al pievel ina producziun. Aschia ha era L’Uniun dramatica da Rueras priu l’iniziativa de menar si in toc romontsch, «Il cavalcaster», ina humoresca en treis acts da sur Pius Venzin, plevon da Vrin. Quella cumedia originala segirescha a scadin aspectatur ina legreivla sera. Al versau regissur. Duri Battesta Venzin, eis ei reussiu da dar la dretga tempra al toc. El ha anflau capavels giugadurs. aschia che scadina rolla ha survegniu siu giugadur adattau. Cun bia curascha han els empriu il toc, vulend dar ina buna producziun, ed igl ei era gartegiau ad els. La premura dall’uniun dramatica da Rueras mereta nies cumpliment ed applaus.
Sco avertura porta ina gruppa da gittaras da Rueras ina cuorta producziun cun quater canzuns che gidan ad embellir la sera aschia che mintgin sa passentar ina emperneivla sera a Rueras e returnar cuntents a casa. Bien divertiment.
In aspectatur