2007 Aschiditg ch’ei dat umens

Rueras arva puspei la tenda
La Cumpignia da teater Rueras presenta la burlesca «Aschiditg ch’ei dat umens»
(anr/gd) Da Pastgas eis ei puspei schi lunsch. La Cumpignia da teater Rueras envida alla premiera dil toc humoristic en treis acts «Aschiditg ch’ei dat umens» da Gerd Meier. La Cumpignia da teater da Rueras exista dapi 27 onns ed igl ei tradiziun ch’ils aspectaturs che visetan las producziuns da teaer en Tujetsch san sedivertir ed emblidar il trot quotidian per entginas uras. Suenter ils tocs «Mias ondas» (2005) ed il toc «Beethoven e musica da rock» (2006) sepresentan ils endisch giugadurs culla burlesca dil Tudestg Gerd Meier. Per la versiun romontscha segna il regissur Hubert Venzin da Rueras. «Il success dils davos onns ha motivau nus da cuntinuar sin quella via e da puspei preparar ina producziun divertenta plein tensiun», di il regissur da Rueras.
Turbulenzas desastrusas
Il toc vegn giugaus entuorn igl onn 1910. El sepassa en ina epoca ella quala igl um saveva purtar la capiala aulta mo sch’el s’udeva tier ina certa elita. Max Decurtins (Reto Schmid) vegn sfurzzaus da sia dunna e da Sia sira da daventar commember dils Grischs. Max Decurtins e siu bien amitg il Francestg Cadruvi (Armin Albin), prefereschan denton da passentar las seras en locals da divertiment. Els ein denton buc ils sulets che han anflau quei alibi per sebetter el divertiment nocturn. Tut va bein tochen che vers commembers dils «Grischs» cumparan a casa dils furbazs. Che manzegnas han combas cuortas sentan ils Grischs supponi beinspert. Scumbegls turbulents e consequenzas desastrusas ein inevitabels.
Co il toc cuntinuescha e schebein ils baus dalla notg ston pitir per lur furbarias tradescha il regissur Hubert Venzin buca. «La cumedia ha ina fin singulara, ella ha denton ina buna fin», quei ha el tradiu. Regissur sco era las tschun giugaduras ed ils sis giugadurs da Rueras e Sedrun selegran d’astgar divertir il publicum cu ei ha nun «Aschiditg ch’ei dat umens».
La premiersa dil toc «Aschiditg ch’ei dat umens» ha liug da Pastgas allas 20.00. Ulteriuras producziuns han liug ils 13, ils 20, ils 21 ed ils 22 d’avrel 2007 allas 20.00. Dumengia, ils 17 ha la presentaziun liug allas 17.00; mintgamai en casa da scola a Rueras.

………