Il Rempli 1914

Correspondenza da Sedrun
Dumengia vargada havein nus diregiu nos pass encunter il beinsituau vitg da Sedrun, il qual paradescha stupent en vestgiu d’unviern.
„Nua meis?“ damonda nus in vegl, probabel in dalla pasta veglia.
„Tgei damonda! naturalmein a Sedrun a teater.“
„Porta neu; da mirar teater han ins buca magliau; igl ei pli perdert da salvar quels raps en sac.“
Denton eis el finalmein tonaton seresolvius da vegnir tier la producziun, forsa l’emprema ga en sia veta.
Ina gronda raspada emplenescha il local. Stupentas canzuns, sco per exempel il renomau „Toni da Strada“ ed „Igl Avat Pieder de Putnengia“, resunan giud tribuna; ils emprems accords constateschan distiguiu tenors e lu il toc sez „Miedi Rempli„?
Il toc vegn giugaus per cumpleina satisfacziun dils aspectatuts, schegie ch’ins savess forsa giavischar tscheu e leu in tec pli bia pissiun e vivacitad. Il miedi fa tutta honur a siu num. Sias pantominas e siu accent el tschintschar marcheschan fetg bein sia ranveraia; era Gezzi, siu survitur, lai encorscher il versau artist. Ils students ed il Viermbal fan lur caussa bein, principalmein il davos dat al toc in til humoristic. En risadas ed applaus ei il temps bunamein memia spert vargaus e la fuola banduna la sala.
Sin scala entupein nus puspei nies vegl d’anson. Ord sia fatscha havess ins quasi siu leger igl „optime“ – „fetg bien“, da dr. Rempli. „Igl ei stau stupent“, replica el, „ed jeu hai ina gada puspei pudiu rir dacormein. Ils raps ein buca fiers a piarder, pertgei bein enqual sa prender ord la producziun in bien coc a casa sia“.
Perquei suandeien siu exempel ed a Sedrun dumengia proxima, tgi che vul sedivertir zacontas uras legramein e sefar libers dallas travaglias dil di.
..co.