Beethoven e musica da rock 2006

Beethoven e musica da rock
La Cumpignia da teater Rueras presenta la cumedia «Heavy Beethoven»
(sb) Da Pastgas sera dat la Cumpignia da teater Rueras la premiera dalla cumedia «Beethoven e musica da rock» da Horst Helfrich. Forsa han els elegiu sapientivamein la musica da Beethoven — per buca far sco tut ils auters che risguardan uonn il giubileum da Mozart? Sper las melodias da Beethoven dat ei era musica in tec pli dira duront la cumedia. Ils davos onns han ils aspectaturs che van a Rueras a mirar teater empriu d’enconuscher il humor dils Tuatschins e quel astga era uonn buca muncar. Ils commembers dalla Cumpignia da teater Rueras ein sepreparai cun grond engaschi e selegran da beneventar ils aspectaturs ella sala da scola a Rueras. La cumpignia exista prest treis decennis e posseda beinenqual giugadura e giugadur cun experientscha da tribuna. Hubert Venzin segna per la versiun romontscha dalla cumedia en quater acts da Horst Hilfrich.
Dapi biars onns s’engascha Venzin cun tgierp ed olma per siu hobi, il teater. Era uonn ha el translatau ed adattau il text e creau il maletg da tribuna. Vitier vegn sia lavur da regissur dalla cumpignia e sco usitau gioga el era uonn ina rolla el toc.
In cass pil psichiater
Il Ludivic Camiu (Richard Cavegn) teidla sgarscheivel bugen musica classica da Beethoven. Siu fegl, Gion Sebastian (Armin Albin) preferescha perencunter musica pli dira. El teidla bugen las gruppas Ramstein, ACDC e Dynamit. Sche omisdus teidlan el medem mument lur musica, strembla l’entira casa. La dunna e mumma Turté Camiu (Astrid Monn) scapass il pli bugen lunsch naven e stat puspei cuort avon in collaps dalla gnarva.
Duront las nozzas dalla feglia Carmen (Flurina Deragisch) vegn la situaziun aunc pli acuta. Tier l’enzinnada vul il Ludivic numnadamein dispet sunar la canzun «Lied an die Freude» ord la novavla sinfonia da Beethoven. Turtè ha tut auter che plascher e consulta il psichiater docter Canetg (Hubert Venzin). Schebein il psichiater Canetg vegn da curar ils dus umens da lur malspirtadadad vulein nus buca tradir cheu. Ulteriuras rollas vegnan giugadas d’Imelda Monn, Mudest Venzin, Ursula Deplazes, Adrian Deragisch, Franzisca Hitz, Agatha Cavegn, Rita Flepp e Reto Schmid.

Producziuns:
Pastgas, ils 16 d’avrel
Venderdis, ils 21 d’avrel
Dumengia, ils 23 d’avrel
Venderdis, ils 28 d’avrel
Sonda, ils 29 d’avrel
Las producziuns entscheivan mintgamai allas 20.00 e han liug en sala da scola a Rueras.

………

MAU