Tissi pils giuvens onns 1970

Teater a Rueras
Ils teaters vegnan pli e pli scarts en tiara romontscha. Ei maunchi igl interess dil pievel, vegn ei fatg valer. Ei seigi grev da survegnir giugadurs, la concurrenza da radio e televisiun seigi memia gronda e.a.v. Quei tut po constar. E tuttina ha il teater popular era aunc ozildi ina gronda muntada. El promova sco mo pauc auter cultura e lungatg matern, el unescha giuven e vegl en lavur e stenta communabla, el porscha era oz buna instrucziun e distracziun a giugadurs e pievel.
Forsa che nies pievel spetga ozildi enzatgei auter dil teater ch’avon onns. Radio e televisiun han destadau e scolau igl egl e l’ureglia digl auditur ed aspectatur. El ei vegnius pli critics. E quei ei en sesez bien. El pren buca serius stravaganzas e strapazzadas ni en fuorma ni cuntegn. El giavischa ina fuorma naturala e sincera ch’ei unida cun la realitad. Il pievel accepta buca pli sentimentads e moralisems. El vul che ses problems vegnien tractai sin la tribuna sin ina moda sempla, capeivla e verdeivla.
Il toc «Tissi per giuvens onns» che l’Uniun dramatica da Rueras ha priu a mauns, tacca in problem fetg actual: la schliata lectura e schliatas cumpignias. Nua che quei tissi meina, vegn ei mussau en moda clara ed entelgeivla
Ils da Rueras, ch’ein tras il traffic da skis e turissem tratgs vehementamein el malruaus da nies temps, meretan tonpli renconuschientscha ed engraziament per lur idealissem e lavur, ton il zun premurau Duri Battesta Venzin sco tuts giugadurs e gidonters. Ina stedia participaziun ei il meglier engraziament, che nies pievel sa porscher.

Teater a Rueras
Haschisch, morfium, nicotin, alcohol, ein nums enconuschents da tissis, che vegnan gudi e che donnegieschan la carstgaunadad.
Ei dat denton aunc in grond tissi spirtal, in tissi che vegn udius en massa, che destruescha sperts, morala, religiun e la veta famigliara. Quei tissi vegn buca cumbattius e suprimius dallas autoritads aschi vehements sco ils sura numnai tissis, ch’ein denton ual aschi destruents sco il gudiment corporal. Quei ei il tissi dalla schliata lectura, da lectura dubiusa, che ignorescha morala, cardientscha e cunscienzia e sutminescha e destruescha educaziuns e relaziuns famigliaras.
Cun il drama „Tissi els giuvens onns“ illustrescha l’uniun dramatica da Rueras in’unfrenda dal tissi gudius e nutrius ord la schliata lectura, in’unfrenda dall’influenza da cumpagnia lischada e lavagada, ch’ha ni tegn ni retegn avon acts da morala e criminala. Ils acturs capeschan oreifer da tener continuadamein ils aspectaturs en febrila tensiun ed attenziun, pil dialog denton bien e schliet.
Ei fuss buca prudent da concluder, senza far in compliment al regissur ed als giugadurs, che prestan lavur veramein excellenta, e ch’han buca schau muncar ni breigias e stentas per il bein reussir dil toc.
Per las proximas producziuns giavischein nus sala pleina, in auditori attent e nus segirein, che tuts van a casa cuntents ed engrazieivels sut  l’impressiun digl effect dal „Tissi els giuvens onns„.

In aspectatur