Engurdientscha fa pitir 1949
Engurdientscha fa pitir
(Corr.) Malgrad il temps disfavoreivel e plein embrugls politics e finanzials che regia oz pir che zacu en nossa tiara e buca il davos en nies agen cantun muntagnard da spir malperinadads politicas dad auas etc. ed iniziativa, la quala nus sperein fermamein che sgoli dumengia proxima dalla glatscha giu, semegliont allas lavinas e cuflas dad oz.
Amiez tuts tals embrugls e dispetas, sco in schuldau denter spadas e ballas, ha nossa cumpignia da mats pegliau curascha da producir in drama da vaglia, che muossa a nus che „Engurdientscha fa pitir„. Bein havess nies comité d’acziun buca saviu eleger in pli instructiv ed edificont drama per il temps dad oz, nua che mo l’engurdientscha e scuidonza regian. Ch’engurdientscha e scuidonza fan pitir, vesein nus sco en in spieghel sin la tribuna a Sedrun, denton sentin nus lu sensiblamein sche nus stuein e laschein gudignar dumengia proxima l’ala seniastra e tut siu progress engiuviars. Ual perquei nies sincer cumpliment al comité d’acziun per sia elecziun d’in drama da vaglia.
La translaziun ha nies reverendissim sur plevon Giusep Durschei procurau, dramatisond la novella dil grond poet e scribent Jeremias Gotthelf cun adattar igl entir fatg a nossas relaziuns muntagnardas. Lectur e lectura dalla Romontscha enconuschan la versada plema dil translatur dil drama „Olma convertenta“ e nus duvrein buca menziunar ch’era questa translaziun cuntenti senza dubi il numerus auditori.
Nus lein buca palesar enzatgei dil cuntegn aschi interessants, che representa nossas relaziuns purilas e muntagnardas, denton zatgei palesein nus a Vus lecturs e lecturas cun plascher e luschezia, e quei che nies sur Giusep Durschei ei buca mo translatur da sura drama, mobein era ual regissur ed ustonza dad acturs e acturas. Ad el gia oz nies sincer cumpliment e grond engraziament per sia attaschadadad, quitau e carezia enviers nossa giuventetgna. Il pli bi e cauld engraziament ei denton aunc adina per regissur, acturs ed acturas ina sala fullanada tier mintga producziun. A tuts aspectaturs ed aspectaturas in cordial beinvegni a Sedrun.
-z -z