Il fegl perdiu 1964

Teater a Rueras
(Corr.) Ual aschi segir sco quei che las hirundellas tuornan inaga per onn en nossas cuntradas, cumparan era onn per onn en gasettas e placats las annunzias da teater en nos vitgs romontschs. Secapescha quei da sesez? Na, cunzun buca ozildi, nua che radio, televisiun ed illustradas porschan distracziun pli ch’avunda, che ha dil reminent buc adina la megliera influenza. Pertgei tut quei che porta mo pura distracziun e buca era aunc concentraziun interna, ha in’influenza destructiva. Mo, porscha buca era il teater distracziun! Ei quei buca ual sia finamira? Tuttavia buca! Igl intent primar dil teater ei il divertiment, la recreaziun, che ei dapli che mo distracziun e che intermediescha valurs spirtalas. Scadina representaziun teatrala duei divertir, mo ella sto er’aunc regalar enconuschientschas instructivas als aspectaturs ed als acturs. Quei vul ussa buca dir che mintga representaziun stoppi esser ina caussa sappi-con seriusa. Il teater ha las pusseivladads da dir verdads seriusas era cun bucca rienta.
Priu aschia, stuein nus bein dir ch’il teater hagi aunc oz — e surtut oz! — sia missiun e giustificaziun. Igl ei perquei mo da beneventar, sche nossas uniuns pli pintgas e pli grondas ein aunc perschuadidas dalla muntada culturala dil teater ed ascendan cun grond anim ed ideal il palancau dalla tribuna per porscher in per uras emperneivla e fritgeivla recreaziun. Possien lu aunc tuts acturs esser perschuadi da lur missiun culturala era il temps d’emprovas e preparaziun per las producziuns!
L’uniun dramatica da Rueras ha preparau e representa uonn il giug biblic „Il fegl perdiu„. Il fegl perdiu ei bein ina dallas pli veglias representaziuns teatralas sin terren romontsch. Mo las verdadas che quella semeglia biblica vul intermediar, ein buca antiquadas, ein buca ligiadas vid in temps e valan adina, era oz.  La historia dil fegl perdiu (ed era dalla feglia piarsa) serepeta gie deplorablamein adina puspei. –
Ina modernaziun e megliuraziun dils indrezs silla tribuna lubeschan da dar quei enconuschent tema biblic cun novs mieds e — sco nus sperein — ad ina moda plascheivla era aunc oz. Il cuntegn dil toc ei enconuschents a scadin en sias lingias principalas eis ei da persequitar sco quei autur (ei dat gie differents auturs da quei tema biblic) ha urdiu la teila gia tratga si ella semeglia biblica. Serestrenscha il giug era principalmein silla acziun interna, maunca tuttina buca ina gronda tensiun e dramatica, che fa il giug plascheivels. Perquei astga l’uniun dramatica da Rueras far in cordial beinvegni a numerus aspectaturs da lunsch e damaneivel.