Il zenn cuescha 1961

Teater a Rueras
La dumengia e mesjamna vargada ha la Cumpignia da mats Tujetsch representau a Rueras il drama «ll zenn cuescha» da Kurt Werner, translataus da signur Sigisbert Giossi, Rueras. Quei toc dattescha digl onn 1653 ord la historia roiala dall’Engheltiara.
Cun grond plascher e deletg san ins mirar co giugadura e giugadurs dattan a quella producziun la vera tempra. In spezial laud mereta la valerusa Elisabet, che capescha entras heroissem e malezia da spindrar la veta a siu car bab «Lord Bridgeforth» il qual ei stateivels a sia cardientscha era sch’il stat fa aurtas pretensiuns.
Igl ei in bien toc cultural, ed ina affera d’amur fa el tuttavia marveglius ed interessants. Ils acturs capeschan da dar lur rollas endretg, en special la giuvna Elisabet, sco era il protectur dall’Engheltiara cun siu caracter materialistic e renitent. Siu fegl d’ina autr’opiniun muossa en ina moda admirabla co la carezia duei victorisar. Ina figura aparti simpatica ei il vegl caluster dalla cuort. Ensemen cun treis buobets orfens representa el entginas scenas veramein comuentontas e plascheivlas.
Tgi che vul guder in mument da bi aspect e recreaziun serendi dumengia a Rueras a teater.
In grond engraziament al premurau regissur per la buna interpretaziun sco era ad actura ed acturs per lur grondas stentas.
All’entschatta san ins udir in‘oreifra prducziun dalla musica instrumentala, dirigida dil valent instructer, scolast Teofil Schmid. In laud spezial mereta l’uvertura „Brautraub“, il toc da pag per la proxima fiasta de musica.
Che la Cumpignia da mats Tujetsch dat il recav da sura teater allas missiuns catolicas demuossa il bien spert e mereta tut sustegn ed engraziament.
A tuts collaboraturs in grond Dieus paghi.
In aspectatur