Il pelegrinadi romontsch ca. 1975Uniun da Lourdes Surselva

da Carlo Curschellas Sedrun, iniziant e fundatur

Sco fetg enconuschent liug da pelegrinadi, ha Lourdes saviu festivar gl’onn 1958 ils 11 da fevrer siu 100avel anniversari. Entgins meins avon havevan pressa e radio fatg attents il pievel sin quei datum. Pliras interpresas da viadi havevan propagau e fatg preparativas per pelegrinadis el numnau liug. Era en pliras pleivs ei vegniu menziunau quella successiun. En entginas baselgias ei per quei di vegniu celebrau ina s. Messa en honur dalla Imaculada Concepziun, la mumma da Jesus.

Quei onn ein miu bab cun aunc entgins participonts da nies contuorn pelegrinai viers Lourdes. Returnaus suenter circa in’jamna a casa ha il bab orientau ed informau l’entira famiglia sur dil curriu e passau duront siu pelegrinadi. Cun vera perschuasiun e grond entusiassem ha el raquintau e declarau la historia da Lourdes cun ils differents presents sanctuaris e lur funcziuns. Fascinaus era el specialmein dalla vera e ferma cardientscha, dil fervent urar e rugar en plirs lungatgs, da differentas naziuns ch’eran medem temps presentas en quei renomau liug. Motivau ha el era nus affons da inagada visitar quei liug marian.

Enzacons onns pli tard, empau sceptics e cun marveglias sundel era jeu serendius cun ina roscha pelegrins a Lourdes. Suenter quasi 20 uras viadi cun tren essan arrivai el liug. Quei ei stau in viadi cumbinaus cun empau sacrifeci. Duront gl’entir viadi havein nus da gliez temps stuiu secuntentar cun seser sin dirs bauns da lenn. Saver durmir la notg ei stau nunpusseivel.

Malsauns, invalids en sutgas cun rodas, paralisai sin barellas, plirs cun autras mendas, sco era persunas pli veglias che basignavan tgira eran staziunai e cargai en 2 carrs da nies tren, dils quals ils bauns eran vegni dismontai per quei intent. Da quei temps exsitevan aunc negins carrs da sanitad en quels trens.

L’emprema surpresa per mei ei stau la gronda staziun da Lourdes cun siu immens traffic. Di e notg, onn per onn arrivan e partan milliuns pelegrins digl entir mund en quei liug. Naven dalla staziun viers marcau e hotels eran sin tuttas vias ina invasiun da glieud e da tuttas sorts vehichels. In menaschi sco in furmicler activ. Arrivaus el center dil marcau havevel jeu giu l’impressiun che Lourdes seigi plitost in liug da commerci e turissem. Grond diember da hotels, stizuns e plirs negozis ein cheu presents. Hanlegiau e purschiu vegn gronda elecziun cun da tuttas sorts devoziunalas. Ina gronda part da quels artechels ei in veritabel «kitsch». Quei menaschi da marcanzia haveva plitost irritau mei ed augmuentau pauc mia cardientscha e simpatia per Lourdes. Il secund di da miu pelegrinadi sundel jeu vegnius pertscharts che buca il marcau cun sia truscha ei il punct culminont. Il liug principal ei il grond e vast circuit cun la grotta nua che Nossadunna ei comparida a Bemardetta, vinavon la fontauna miraculusa ed ils biars sanctuaris, ils asils e spitals.

Entir rapport sco PDF