La cameriera da Robespierre 1938

Teater a Sedrun, dumengia ils 16, ils 23 da schaner e Nossadunna da candeilas (2 da fevrer) allas 2 s.m. –  La cameriera da Robespierre – Cumedia en 5 cats da Franz Heinrich Achermann, translatau da Toni Hendry; Societad da musica Sedrun e Chor viril Sedrun; reschia Toni Hendry

Teater a Sedrun
La societad da cant e musica da Sedrun han tradiziunalmein puspei attestau lur gronda e valenta capientscha dramatica en schar reviver silla tribuna la “Cameriera da Robespierre”. Pilver, il drama cuntegn in coc historic e dat in bi maletg dalla tresta revoluziun franzosa e gest perquei vala il toc gia enzatgei dapli. Il senn moral savess cuort esser quel: Tgi che cava la fossa als auters dat sez lien, quei che ti vul buca ch’ins fetschi a ti, fai mai als auters.
Igl autur dil drama ei in spiritual a nus fetg enconuschent, in renomau scribent e poet dramatic dil marcau da Basel. F. H. Achermann. – Il dirctur dalla gronda lavur spirtala e lingusitica dalla viarva romontscha e dalla biala prestaziun silla tribuna, signur scolast Toni Hendry, documentescha puspei danovamein sia capacitad demussada da siu temps el “Capitani Jaguar”. Il lungatg ei bials e culonts, l’acziun sin la tribuna viva spir humor, l’attenziun dils auditurs excellenta ed ils acturs prestan lavur cumpleta. – Bravo vus Svizzers animai da fideivladad e humor en grevas e trestas uras. Vus representeis il spert vivificont en quella cametschadad da rampins e faulsadad dalla revoluziun franzosa, nua ch’il meglier amitg tarmetteva siu meglier amitg sin la guillotina. Era als dus menaders franzos Robespierr e Danton nies grond cumpliment e bien success per las proximas producziuns.
Tgi che vul guder ina producziun da vaglia, medemamein era schar liber per in mument ils gnarvs dil rir, quel duei resalvar sia dumengia da Tscheiver per ina schlittada a Sedrun. Tuts bandunan la sala edificai e cuntentai.
th.

Seniester sin omisduas fotos: Luis Schmid (1916) da Zarcuns