Ils capitanis da mats

Caduff Gion Crisost e  Cristian Deragisch 1939/1940	CMT Capitanis e sergents

Far parada
Astgar far parada las fiastas muntava per ils mats ina gronda honur ed obligaziun per aschia embellir il survetsch divin. Cun plascher e slontsch marschavan ils mats stediamein sut il commando dil capitani cun bandieras sgulatschontas e buis sin schui suenter la societad da musica. La scharscha da capitani e sergent dalla cumpignia da mats eran uffecis ualti tschercai. Capitani e sergent stuevan ver 25 onns per saver retscheiver quell’honur. Quella sebrattava giu, ina ga a quels da dado il Dutg grond e l’autra ga ad in giuven da Rueras. Mintgaton vegnevan era quels da Maunsut (Cavorgia e Surrein) ni quels da Dadens igl uaul (Selva e Tschamut) honorai cun capitani u sergent. Era ils bandierels stuevan ver ina certa vegliadetgna per astgar purtar in fengli. Ina gronda honur veva quei mat che astgava purtar la fana biala. – Pli baul eran ils commandos dil capitani en tudestg sco el militer. Avon ver 50 onns ha Gion Felici Monn (1876-1954) da Camischolas procurau per il commando en romontsch. Da lezs onns era ei tradiziun ch’il capitani da mats fageva in plaid da Sontgilcrest. Suenter viaspras serimnava in grond pievel avon la casa pervenda, nua che la societad da musica ed il chor mischedau seproducevan. Lu suandava il plaid dil capitani da mats. Il plevon scheva semegliontamein enzacons plaids d’engraziament. Finidas las ovaziuns, envidava el la cumpignia da mats, la societad da musica e la suprastonza communala ad in refrestg en casa pervenda. Per in’uriala stevan ins si da cumpignia cun cantar bialas canzuns popularas. Il caplon da Rueras haveva era la buontad da dar in refrestg alla cumpignia da mats la fiasta da Sontgilcrest. Tier las fiastas da parada da Rueras cumpignava la societad da musica ed ils mats da dado il Dutg grond mintgamai il plevon e caplon da Sedrun a Rueras e lu puspei anavos, secapescha tut a pei.

Ils mats che fagevan per l’emprema gada parada havevan da cumparer ina dumengia avon l’emprema fiasta a Tgamaura per vegnir instrui dil capitani e sergent, co els hagien da marschar e purtar la buis. Capeivel, havevan ils responsabels gie empau quet da presentar ina cumpignia bein disciplinada. Suenter las festivitads dalla davosa fiasta da parada (sogn rusari) offerevan il capitani ed il sergent in refrestg alla cumpignia da mats e societad da musica sco engraziament per l’honur retscharta ed era sco renconuschientscha per igl engaschi duront las fiastas da parada. Tier messas nuvialas vegnev’ei era fatg parada e lu stediamein, era da mats pli vegls.

Pli baul fagevan ils mats parada entochen 30 onns. Lu retschevevan els ina menziun d’honur. Oz han ins surschau il far parada plitost als giuvens gest ord scola. Igl ei donn che mo paucs mats sur 20 onns han buca ton ideal da serrar las retschas da parada dalla cumpignia da mats.

1936/37 Capitani Gion Andriu Monn e sergent Sep Lurenz Hitz

1938 capitani Felici Schmid e sergent/wachrmeister Heinric Schmid

1947/48 Duri Vigeli Cavegn, capitani, e Giochin Hendry, sergent

1964 Capitani Gion Andriu Berther e bandierel Rest Flurin Gamboni