Gionet da Giuv 1945

Gionet da Giuv
(Corr.) La finamira dil scribent da questas lingias ei buca da dar in detagliau maletg da quei stupent giug d’affons, creaus da signur scolast Felici Hendry, mobein in cauld engraziament agl autur sco era als acturs, ch’han giu in splendid success. –
Gionet da Giuv ch’ei a nus enconuschents dalla tradiziun, era in um da spir vertids, in grondius discipel da Jesus Cristus e nunstunclenteivel veneratur da Maria Sontgissima, in exempel en casa e sin via. Questa veglia raquintaziun lai signur scolast Felici Hendry reviver en sia lavur, dend agl entir toc in profund senn. Plinavon sedistingua questa oreifra prestaziun muort il lungatg, essend tal elevaus e cultivaus e tonaton fatg capeivels e naturals. –
Ils aspectaturs sesentan veramein in triep tschentaners anavos, enamiez il traffic e menaschi dalla tgeua veta purila al pei dil Crispalt. – Il combat denter Rest e Gionet, dus frars, – fegls d’in beinstont pur da Giuv, ei descrets cun gronda capientscha e finezia ed ina buna dosis experienza ord cruschs e travaglias quotidianas. – Gest igl odi da Rest viers siu frar Gionet ch’ei il preferiu en casa e sil plaz-vischnaunca, ei filaus manedlamein e consequent entochen el pli davos cantun. Rest ei gl’exponent dil schliet. Gionet l’olma pura e schubra, la personificaziun digl um ideal. La finiziun cuntenta, – il bien gudogna.
Igl ei quei mo ina pintga sclarida viaden en quest toc genuin, ed jeu lessel buca tradir memia bia. Ins vegli sez ir e seperschuader. – Dumengia, ils 15 d.q. allas 14.00 ei la davosa producziun.
-d-