Il narr da Frundsberg 1967

_
Teater a Rueras – Il narr da Frundsberg
Malgrad il spuentem e siglientem dil temps dad oz, ha l’uniun dramatica da Rueras buca schau per breigia, dad era uonn presentar al pievel in drama. Respect a tuts che sedattan breigia e premura per ina caussa d’ideal. Igl engraziament ei bein savens pigns, mo persuenter duei ed astga la satisfacziun da ver prestau per la cultura ed igl ideal esser pli gronda. Il narr da Frundsberg senumna il drama che vegn daus uonn a Rueras.

El casti da Frundsberg a Ruschein regia in clima stepatsch. Il vegl cont Heinrich sa cun tutta buna veglia buca dar a sia giuvna dunna ina biala e ventireivla dimora. Canal, gl’administratur dil casti, senezegia da quella caschun, cun rampins zun maligns, cun manzegnas ed intrigas capescha el da semnar discordia, disturbis e malaveglias ella veta da quella famiglia. 
Schizun il fegl Gieri, che viseta ils ses per selegrar, seruassar e sedivertir, vegn malignamein tratgs en latschs  zun prigulus. Denton il narr — il narr ei cheu. — Nuot ei schi fin mulau, ch’ei vegn buc’alla glisch. — Suenter grevas e diras uras — anfla puspei giustia plaz — la faulsadad e malrecliadad — il meritau castitg.
Il toc ei originals, screts dil versau scribent sgr. scolast Alfons Vinzens Trun. In cordial engraziament auda ad el per quella biala lavur per la tribuna romontscha.

Teater a Rueras
Cura ch’ins sesa en sala da teater avon la tenda serrada, va quei e tschei patratg tral tgau ad ins. Ins sesenta en emprema lingia engrazieivels, ch’ei dat en nos vitgs romontschs aunc glieud che lavuran e sestentan per biala ed edificonta cultura, glieud ch’unfreschan seras en e seras ora lur temps e lur ruaus per saver delectar ed instruir il concarstgaun. Ei quei buca in mussament che la ragisch da nies pievel ei aunc buna, ch’ei regia aunc spért da sacrifeci, spért social e senn per valetas culturalas e restontas. Secapescha quei da sesez en in temps nua che «grondezias» da sport e da film, da «musica» e «sault», nua che daners e maschinas paran da prender il carstgaun pli e pli fetg en lur possess?
Il narr da Frundsberg ei in drama plein tensiun, che vegn era mantenida dils giugadurs oreifer atras igl entir toc. Il lumpazi d’in Canal, administratur dil Casti da Ruschein, para da survegnir plaunet il suramaun. Sia reit ei fina.
Il mal para da triumfar. Mo lu cumpara tuttenina in narr. E quel di la verdad. E la verdad ei gitta sco ina spada. Plaun plaunsiu fa ella vau e victorisescha. Il carstgaun schliet e pervers strufegia sesez. Il ruog va tier la fontauna tochen ch’el rumpa.
Cun quei patratg tuorn’ ins ord la sala da teater a Rueras e cun in cordial engraziament al capavel regissur en special ed a tuts giugadurs per tonta breigia e stenta.
In aspectatur