Vischinadi Gonda
Cudisch de „Notizias per ils vischins de Gonda 1919“ e „Vischins Gonda 1931 – 1957“
Archiv communal Tujetsch sut cudischs nr. 15.47 e 15.48/ Nudau cronologicamein. Entschiet igl onn 1919 da Tumaisch Beer, sesents lu en casa che s’auda oz a Lucas Soliva.
Igl archivar Tarcisi Hendry.
Giudapeis al Cuolm da Vi
Da vart dretga e da vart seniastra dil Drun, enamiez ina spunda da pintga pintga pendenza e tschinclada da bellezia bials praus grass che fan bufatg stat igl amureivel vitg da Sedrun, mess ora aposta per tgi che vul mirar. Las casas sezzas sedattan buca dapli che quei ch’ellas ein e cunterfan a nuot ed a negin. Quels paucs casaments macorts che stattan per cletg onz sigl ur ston seturpegiar d’enzatgi. – Las plauncas da Niregl ed ils dus vallutgs ellas costas da Cungieri mettan ualvess enzatgi en prighel. Perencunter reiva igl uaul giuven da Niregl dallas muotas si enviers ils stavels da Cungieri e tegn tschelau las plagas aviartas che muossan incuntin vi cul det. Ellas sesarvan, las plagas e cutrognan ils bauns ed ils plats plinengiu. Atgnamein tut senza ch’enzatgi sappi semetter encunter pli da rudien. Sedrun e Gonda han semplamein la pustetia dil Drun ed il vitg emperneivel da Camischolas ha tratg la bustgetta liunga, lezza ga ch’il dargun ha fatg la sturnella ed ei ius definitivamein dalla vart anora – encunter Sedrun. Actualmein han ins mess siaras el vau ed in detg buccari, aschia ch’el periclitescha ni las avdonzas, ni la bellezia punt surenvi e maina pli il santeri in toc plinengiu.
Corporaziun canalisaziun dil vischinadi da Gonda
… Suenter ina liunga e bein ponderada discussiun passan ins tier la votaziun. Ils vischins concludan da prender si il project per menar giu las auas e quei unanimamein. …
Protocols dalla corporaziun canalisaziun dil vischinadi Gonda 1950 – 1978
