La davosa processiun dils Tujetschins sil S. Gottard

Skizza cultur-historica da Guglielm Gadola, Mustér

Introducziun
Dumandau che jeu hai in vegl Tujetschin, dapi cu la processiun dil S.Gottard dateschi e con ditg quell’hagi cuzzau, ha el rispundiu cun tutta promtadad: „Quella processiun ei adina stada; cuzzau ha la mo entochen 1827!“ – „Adina“ ei empau da ditg per esser ver . . . hai jeu tertgau, mo essend che igl onn da sia tschessada, 1827, fuva exacts, ha quella remarcabla processiun da nos vegls Tujetschins, che cuzzava mintgamai dus dis e che menava els sin la tschema dil Munt Avelin (Gottard), cudizzau mias marveglias – e cuntentau mias breigias . . .
Las fontaunas historicas partenent l’entschatta da quella pia instituziun, che ha cuzzau entochen avon biabein 100 onns, cuoran oz buc aschi clar e visclamein sco’ls quater gronds flums, che han scalprau lur vau en fuorma de crusch ella profunditad dil pli dir granit dil S.Gottard, mo ellas ein tuttina buc aunc schigiadas diltut!

La davosa processiun dil Gottard
Dapli davart la processiun sil Gottard mira:
Processiun sil Gottard

 Gottard, dessegn da 1840, 13 onns avon fuvan ils Tuatschins aunc stai leu cun processiun.