Igl aunghel dalla pasch 1951

Teater a Sedrun     Program
(Corr.) Tgi che traversescha in bi di da sulegl la Val Tujetsch, observa ina mes’ura sur Rueras/Dieni ina caplutta sin in crest sper in diember baghetgs. Giuv senumna il liug. Tenor veglia tradiziun duei Giuv esser staus in dils emprems vitgets dalla Val Tujetsch. Igl onn 1768 dumbrava quei vitget aunc tschun fiugs cun 22 persunas. Igl onn 1805 stevien tenor pader Placi a Spescha mo duas casas a Giuv. Oz sesanflan leu neginas casas pli. Mo la caplutta da s. Bistgaun stat aunc leu e regorda alla veta e cardientscha da quels habitonts da tschentaners spirai.
La caplutta da Giuv ei dedicada a s. Bistgaun e sa esser baghegiada entuorn 1650. Probabel steva leu avon in’autra caplutta, che ha giu la sort d’aunc auters baghetgs el contuorn, che la lavina ha priu si dies e purtau sco da far termagls giu ella val. La presenta caplutta savess raquintar bia dil burlir ed urlar dalla cufla, dil ramurar e fraccass dalla lavinas, che sietan aschi savens giud las teissas plauncas e sederschan cun vehemenza dretg e seniester giuaden ella val. Ina crusch vid il mir regorda alla disgrazia da 1836, nua che quater giuvens perveseders ein vegni ella lavina.
Aber ella stat sin schliet fundament ed ei sin dar ensemen. Cun prighel da veta van ils pelegrins il zercladur en ella a messa per recumandar la famiglia ed ils muvels dallas alps a s. Bistgaun, il protectur dils muvels. Ei savess capitar als pelegrins quei ch’ei capitau ad ina dunna da Giuv. Da quella vegn ei raquintau, ch’ins havevi mess ina gada ella da pign affon en in carret d’affons e che quei carret seigi ius cun ella dalla plaunca tessaglia giu tochen giu ell’aua – senza far enzatgei. –
Cun beinvuglientscha ei l’Uniun dramatica Rueras sepurschida da far in teater en favur dalla caplutta da s. Bistgaun. Ellla ha giu in bien egl d’eleger in drama da pader Maurus Carnot: „Igl aunghel dalla pasch„. Recumandar lessen nus a tuts dalunsch e damaneivel d’ir a Sedrun a teater. Oravontut seigi la frequenza dil drama recumandaus a quels da Tujetsch. Lez han tuts in grond avantatg dalla caplutta.  Sogn Bistgaun veglia di e notg leusi sil crest, benedescha la val anen ed ano, pertgira la fumeglia e protegia ils muvels d’in e scadin.
La benedicziun e protecziun da s. Bistgaun tonscha pli lunsch. Ella tonscha tochen en Curnera, ell’Alp Tschamut e perfin tochen enta Nalps e pertgira fumeglia e muvels d’ordeifer la val.
Ussa, car lectur, buca targlina e sedecida d’ir ina dumengia a Sedrun a teater. Il program anfla il preziau lectur ella gasetta hodierna. Vas ti lu in bi di da stad ni d’unviern tras la val e vesas la nova caplutta da s. Bistgaun sas ti selegrar e tertgar cun in tec luschezia: „Era jeu hai contribuiu enzatgei alla caplutta da s. Bistgaun“.