L’oraziun dalla mumma 1953

Teater a Sedrun
La ludeivla musica da Sedrun sepeina quels dis per la producziun digl enconuschent drama „L’oraziun dalla mumma„, translataus da nies convischin signur Sigisbert Giossi da Rueras, che fa era il regissur. Ei setracta d’in bien toc popular cun bia acziun ord las relaziuns da nies agen tschespet grischun. Ils acturs han sedau gronda breigia da dar il toc en uorden, aschia che tuts aspectaturs san spetgar ina stupenta representaziun. Sut la valenta bitgetta da signur scolast Teofil Schmid vegn la musica ad embellir il giug cun entginas producziuns musicalas. Nus giavischein a tuts cooperaturs in cumplein success.
D.

Teater a Sedrun
La sesiun da teater ha puspei priu sia entschatta en tiara romontscha. Aschia ei era la Societad da musica da Tujetsch seresolvida da puspei legrar il pievel cun in toc teatral. Ella presenta uonn alla tribuna: „L’oraziun dalla mumma„. Ei setracta d’in drama ord nossas relaziuns e valladas grischunas. In toc che perschuada dalla forza dall’oraziun, dalla carezia per la patria e dalla giustia.
Per quest stupent toc che tschaffa ils aspectaturs entras siu bien ed instructiv cuntegn, ha signur Sigisbert Giossi capiu dad eleger per mintga rolla zun adattai acturs. Ins sto tedlar il meini dil pievel e lu san ins dir il meglier quals tocs inflammeschan e van il pli a cor. Igl ei quels che corrispundan a nossas relaziuns ed a nies patertgar, sco quei che quest toc muossa clar e bein.
Treis gadas han ils premurai acturs gia presentau quei oreifer toc. Treis gadas han els per lur grond plascher e satisfacziun astgau constatar la sala pleina aspectaturs entusiasmai. Treis gadas vegnan els aunc a passar silla tribuna ed els speran, ch’els astgien era tier quellas representaziuns legrar per entginas uras in grond diember d’aspectaturs. Vegni a Sedrun, ina schlittada per seperschuader da quest oreifer toc vala veramein la peina e Vus vegnis buca ad esser enriclai anzi entusiasmai.
T. B.