Crusch e steila sovieta 1948

Teater a Rueras
Ferton che diplomats e regents sestilan e sescarpan vid partiziuns ed in neiv plan da pasch e concordia, cun pign success, essend ch’igl Oriental ei ualti dirs e pretensius, ein nos giuvens da Rueras sededicai e sestentai sin la tribuna per dar a nus in maletg co ei va beinduras leuo el mund. Bein ei l’uiara cun tut sia brutalitad finida, mo las plagas da quella buca megliuradas. Ils Cotschens fan aunc adina catscha sils superiurs da nossa cardientscha e spargnan negina breigia e crudeivladad per extirpar e ragischar ora quella.
Ual per quei intent han ils giuvens da Rueras capiu dad eleger il toc: „Crusch e steila sovietica„. Quei toc representa a nus la persecuziun, crudeivladad e malgiustia dils Cotschens e ses menaders viers il pauper pievel russ e buc il davos encunter nossa cardientscha.
Quasi aschi profundamein sco ils patratgs mond sin viadi tras il sulegl primavaun che dedesta tut la natira dil sien d’unviern, ual aschi educativs ed impressiunonts ei il drama, che nos giuvens representan a nus.
Perquei nies sincer cumpliment a tuts acturs. In cumpliment special ed engraziament auda al capavel e nunstunclenteivel regissur, signur Sigisbert Giossi da Rueras, il qual ha capiu da dar al drama la vera tempra.
Cuntents da haver spendiu in per emperneivlas uras en sala da teater a Rueras giavischein nus als acturs aunc bia aspectaturs ed aspectaturas las proximas dumengias. Bien success!
, ..z ..,