Ils davos pagauns a Ruma 1956

Ils davos pagauns a Ruma
(Corr.) Cul declin digl onn ha era la sesiun da teater priu sia entschatta. Quei e tschei vitg, quella e tschella ucliva annunzia la representaziun d’in u l’auter toc dramatic. Negin menziunescha las nundumbreivlas stentas e fadigias preparatoricas; ins ei semplamein promts e spetga ils aspectaturs. Ina stedia frequenza lai emblidar las breigias, dat tschaffen ed anim als organisaturs.
En tutta mudestadad s’annunzia era la Cumpignia da mats Tujetsch cun in toc historic „Ils davos pagauns da Ruma„, da Werner Mehle, viarva romontscha da Sigisbert Giossi.
Sco gia il tetel di, tract’il toc il davos cumbat denter cristianissem e paganissem. Per il paganissem che dat las davosas zachignadas ein tuts mieds lubi e cun acts da violenza, conspiraziuns e cumplots sesprova el da semantener. Tut ei denton van, Cristus victorisescha.
Il regissur, signur scolast Leci Jacomet, ha capiu l’interpretaziun dil toc ed ins queta veramein d’assister ad in schabetg real. In grond meret han secapescha ils giugadurs che dattan lur rollas cun tschaffen e perschuasiun.
Tgi che vul pia haver in’emperneivla recreaziun vegn a Sedrun ed assista alla representaziun dils davos pagauns da Ruma. Gl’ei bi ed era schiglioc sa Sedrun prestar zatgei, gl’ei sesiun!

Teater a Sedrun
„Ils davos pagauns a Ruma„. Ins ei supplicaus da prender per notizia che las producziuns da suentermiezdi entscheivan gia all’1¼ uras e buca sco publicau egl inserat e sils placats pér allas 2¼.
(Comm.)