Sontga Genoveva 1946

Sontga Genoveva
Martin, oz has ti veramein ina luna da fiastas e fas ina tschera, sco sche ti havesses acquistau miez il mund. – Scueschas forsa a mi, sche jeu sun oz empau pli cuntents e leds? – Na, na, gliez buc! Mo stodas marveglias vess jeu magari, tgei ei la cuolpa d’ina tala bunaveglia?
Sch’ei talenta tei da tedlar, sche tradeschel jeu bugen miu pign misteri. Sas, oz sun jeu staus a teater. Propi in veritabel teater e buca in da quels sco quei ch’ei succeda mintga di en la veta. – A teater sun jeu staus bia ga. Denton, sur tuttas steilas beaus sun jeu mai staus perquei. – Gie, sas, ei dependa tgei teater ch’ins vesa e co el vegn fatgs! – Sche nua eis pomai staus e tgei toc miraculus has viu? – Jeu sun staus a Sedrun e haiel viu il toc da Sontga Genoveva. – In teater da sontga Genoveva! Dat ei era zatgei aschia. Jeu enconuschel la legenda da quella sontga, e sche jeu sbagliel buc, havein nus a casa in cudischet pli vegls che paun e latg sur la sontga Genoveva. D’auter sai jeu lidinuot. – Pusseivel! Quei ei strusch da crer! Ti eis schiglioc ualti sil current e nuota in schani che has aunc mai cuchegiau davos la glina neu. Pigl auter tut san ins mai saver! – Gliez ditgel jeu era. Mo di, tgi ha lu scaffiu quei toc e co fan ils da Tujetsch?
Quei drama ha nies sur Fry fatg ed adattau zun stupent a nossas tribunas. E co ils da Tujetsch fan? O gliez ei ina leva damonda. Sco quei ch’ei fan adina. Stupent! Mo mira leu vegn Gieri. Lez ei era staus cun mei. Damonda lez e lein mirar sch’el ei buca dil medem meini! – Ti Gieri, nies bien Martin sa buca calar da parolar dil teater ch’el ha viu oz. Eis ei veramein enzatgei aschi stupent? – Daveras! Jeu sun mintg’onn tscha e la a teater. Mo in pli bi toc che Sontga Genoveva hai jeu darar viu. – E fan ei lu era schi stupent sco il Martin di?
Gie, stupent fan ei. Secapescha ch’ei dess aunc enqual caussetta da criticar. Manegias buca era Martin? Genoveva fa per exempel grondius, savess tuttina denter auter metter pli bia vigur en ina expressiun ni l’autra. Il cont! Lez crei jeu che fuss, sch’ei dess aunc conts en nossa tiara, adattaus per esser cont en verdad. El ei serius, sche buca memia serius, nua ch’ei drova ed exprima era il sentiment, nua ch’ei basegna. Il Golo! Gnanc da piarder plaid! Grondius! Il Drago! Ina greva rolla! Ironia, flattem, curascha ed odi sescumbeglian cheu tut in en l’auter. Veramein difficil! Mo il regissur ha tscharniu bein. Igl actur fa sia caussa en uorden. L’Emma, ils assassins ed ils affons fan sco ils auters, medemamein stupent. Insumma tut las rollas ein dadas bein ed jeu pos nuota parolar pli ditg. Va tez e mira, ti vegnas mai ad esser s’enriclaus.

Sontga Genoveva
(Corr.) Sontga Genoveva ei veramein in teater cun in’attracziun aparti. La dumengia sera allas otg, mes’ura avon l’entschatta, era il davos cantun dalla sala occupaus. Il toc ha igl avantatg ch’el porscha a mintgin enzatgei, pon ils caracters aunc esser aschi differents. Ins ei tschaffaus dall’acziun dagl emprem tochen tier il davos maletg. Il reh ed instructiv cuntegn ei als biars enconuschents ord la legenda dalla sontga. Acturas ed acturs laian reviver stupent ils trests eveniments el casti dil cont Sigfried.
La cumissiun d’acziun ha capiu d’eleger ils acturs. Ils vegls e cumprovai campiuns fan lur caussa excellent. Era ils giuvens sesprovan d’imitar lur bien exempel. Per noviz ves’ins cheu surprendentas prestaziuns. La rolla dil Drago, ch’ei bein ina dallas pli difficilas, ei en mauns d’in zun capavel actur. Ils bandits ei gnanc da dir, quels fan lur caussa sco da beiber aua. Era las giuvnas, che passan per l’emprema gada sin tribuna representan lur rolla cun anim e fin sentiment. Tier ellas corrispunda era la vusch e statura fetg bein allas pretensiuns dil toc. In special cumpliment descha al pign nurser che conquista meisterilmein la simpatia dils aspecaturs.
In impurtont factur dil teater ei era il vestgiu dalla tribuna. Senza exagerar astgel jeu dir ch’il capavel pictur, Toni Columberg da Mustér, ha propi capiu d’accumpignar il toc cun bials e fetg adequats maletgs.
La sequenta representaziun vegn dada dumengia proxima. Tgi che ha tschaffen da veser in bi teater prendi il tren special e vegni a Tujetsch.