Gratulaziuns

Brev 01 ____________________________ AcT 21.31.4 Sc 71

Tschamut, ils 29 da december 1866

Carissims geniturs.
Jeu sai cun plaids strusch exprimer, tgei sentiments pli cordials ruaussan en miu engrazieivel cor, cura che jeu pondereschel madiramein ils paterns, schi sco materns benefecis a mi schi rehamein da vus o cars geniturs duront gl’entir cuors da mia affonila veta schi graziusamein prestai.
Grad vid quei motiv particularmein, sco era tenor il bi usit da vegl enneu schon introducius, selubeschel jeu tier la finala digl onn, che svanescha puspei ella mar dalla perpetnadad d’augurar a Vus cars geniturs digl Altissim il sulet remuneratur da tut il bien, detti ed enriheschi Vus cun pusseivla benedicziun spirituala e temporala facilitonta ed allegronta prosperitad, sinaquei che Vus aunc biars onns per mia pli gronda conzolaziun, vivies enamiez nossa famiglia per nies pli cordial legherment e consolaziun.
Supplicheschel pia da vuler agardir quests mes sempels, aber ton pli cordials auguris sco ils sincers mussaments da mes pli intims salids e respects cordialissims, cun quels restel tut il cuors da mia veta.
Vies carezond ed obedeivel fegl,
Giachen Antoni Deflorin

Brev 02 __________________________________ AcT Sc 106

Sursaissa, 15.III.1951

Car padrin,
Ord la Gasetta Romontscha haiel enderschiu che Vus festiveies damaun il 75avel onn da naschientscha. Denter quels che selegran il pli fetg sur quei Vies anniversari sesanfla era Vies figliel a Sursaissa.
Cun plascher tarmettel jeu a Vus mia pli sincera gratulaziun ed augureschel aunc ina liunga ed emperneivla cuntinuaziun dalla sera dalla veta.
Entschavend la quarta part d’in tschentaner da veta, mireis Vus anavos sin ina veta bein dominada e dirigida e quella revista renda satisfacziun e forza da mantener la lingia grada encunter la gronda fin e mira da scadina veta suenter la veglia da Diu.
Damaun essas Vus igl emprem silla patena dalla sontga unfrenda. Jeu roghel per Vus che Niessegner mantegni Vus aunc biars onns e laschi luvrar Vus alla meisa da scribent per il beinstar spirtal e spiritual dils lecturs romontschs.
Retschevei aunc inagada mes pli cordials salids ed auguris
Vies figliel
sur Placi Huonder

Brev 03 __________________________________ AcT Sc 106

Cuera, ils 17 da mars 1951

Preziau amitg,
legend cun entgin retard la “Gasetta Romontscha» endrieschel jeu per miu smarvegl, che Ti has festivau ier Tiu 75avel natalezi. Schegie che la fiasta ei gia vargada, sai jeu buca far cunmeins da gratular a Ti per Tia fiasta giubilara augurond tut bien per Tiu beinstar corporal e spirtal. Niessegner concedi a Ti buna sanadad ed ina pascheivla e sereina serasontga, sinaquei che Ti sappies metter tut bein a guvern. En medem temps sesentel jeu obligaus d’engraziar a Ti per tut ils biars e buns survetschs che Ti has fatg alla mumma romontscha ed alla scienzia che s’occupescha culla perscrutaziun da nossa viarva romontscha. Tes survetschs reveleschan ina zun rara concepziun ideala dall’jerta spirtala che mereta laud ed engraziament da tut quels che lavuran per il medem ideal e che san aunc appreziar ils beins culturals d’in pievel.
Engraziond per Tia lavur e premura tarmettel jeu a Ti mes pli cordials salids ed auguris per Tia fiasta giubilara e per Tiu avegnir.
Tiu attaschau
Ramun Vieli

Brev 04 __________________________________ AcT Sc 106

17.3.51

Cun caschun da nossa radunonza ordinaria annuala, tarmetta il cussegl d’administraziun ed ils revisurs da quen, schegie cun empau retard, in matg da flurs circumdaus cun nossas gratulaziuns e nos megliers salids ed auguris sin Vies 75 avel onn. Nus lessan buca tralaschar da cun quella caschun era exprimer in grond engraziament per tut bien prestau visavi nossa fatschenta.
Cun la proxima occasiun, lein aunc seregurdar da Vus cun mettels fortificonts.
Cordials salids
Baseli Berther, president
Cavegn Cristian
Venzin Christian
Baseli Huonder
Alfons Berther