Nozzas

Brev 01 ____________________________ AcT 21.31.2 Sc 71

Camischolas, igl 1. da november 1909

Cara madretscha!
Sco Vus saveis forsa schon sun jeu ussa spusa, havein schau clamar ora dumengia vargada per l’emprema ga. Perquei vulessel cheutras dumandar Vus sco madretscha, schebein Vus havesses la carezia da vegnir ils 16 da quest a nozzas. Sche Vus vegnis, havein nus bugen, cass cuntrari saiel era buc haver nuidis, pertgei igl ei halt lunsch. Salidei il Lezi pign. La Turte lai era salidar ed ei sauna. La Clementina vegn forsa ussa?
Pia cordials salids da mei e miu spus.
Vossa figliola Schmid Barla Catrina e Cavegn Lucas

Brev 02 ____________________________ AcT 21.31.2 Sc 71

Sedrun, ils 28 da november 1909

Cara madretscha!
Engraziel a Vus oravontut per la carezia demussada visavi mei. Haveis mussau memia gronda stenta, aschinavon sco Vus essas lu aunc buca vegnida si. Sundel ussa secolocada a Sedrun (sin Cadruvi) sco Vus saveis schon. Sco haiel udiu dalla Clementina, steis Vus leu vinavon cul Lezi pign, endretg aschia. Cura ch’ins ha bien ston ins guder, ei mintga cass meglier che giun Cavorgia denter tons persequitaders, haveis a Vaz. Forsa ….. ni quasi franc vegn la Clementina primavera puspei giu tier il Vinzens, sch’ella damogna buca via Vus? Ughegeis forsa era aunc quei spass ni pli bein detg quei pass sco Vossa figliola ha fatg e resteis leu cul Lezi ni forsa cul Paul Tanò?
Sundel da present sauna, il medem sperel da Vus omisdus. Oz han ei satrau la Rosa dil Gion Antoni Monn (da Stiafen) a Sedrun.
Pia aunc inagada mes cordials salids ed engraziament da mei e miu carissim consort. Niessegner vegni a remunerar e benedir Vus sin in auter mund. Cun salids ed in grond Dieus paghi siarel mia brev culla speronza da seveser lu inaga ensemen puspei (sin Cadruvi).
Barbara Cathrina Cavegn Schmid
NB. Salidei il Lezi, in auter onn visetel lu puspei avon ch’ir a Zitegl el.