Senza cuolpa 1962

Teater dil Chor mischedau Sedrun a Rueras
(Corr) «Senza cuolpa» secloma il drama elegius dil Chor mischedau Sedrun. Gl’ei in dils davos sche buca il davos drama translataus da reverendissim sur dr. Carli Fry p. m. Il scribent da questas lingias ei staus presents all’emprema producziun dil chor mischedau. Senza far cumpliments e reverenzas nunfundadas ston ins constatar, ch’ils giugadurs dattan lur rollas oreifer. Gl’ei quei senz’auter il meret dil president dil chor mischedau, signur Placi Deragisch, che funcziunescha el medem temps sco regissur dil toc.
Ins ei captivaus gia egl emprem act d’ina gronda tensiun, suenter che Toni Riedi, il fegl da signur gerau Albert Riedi, banduna innocentamein la perschun, nua ch’el ei staus a ferm duront sis onns e quei per cuolpa da faulsas perdetgas. La tragica sort dil pauper Toni vegn aunc augmentada entras la dira sentenzia e renitenzia da siu agen bab, che renviescha el dalla casa paterna. Auter patratga sia mumma Trina e sia spusa Carlina, las qualas ein perschuadidas dall’innocenza da Toni e battan cun curascha encunter il fauls accusaders. Plaunsiu vegnan quels engartai ellas persunas dil pur dil plaun, Hannes e siu fumegl Sep. Il castitg meritau suonda pils scrocs. Hannes vegn tuccaus dal cametg e miera tut anetgamein. Ella famiglia dils Riedis retuorna puspei ruaus, pasch e ventira.
All’entschatta dil drama conta il chor mischedau treis bialas canzuns. Tgi che frequenta las producziuns da cant e teater sura allegadas banduna la sala a Rueras cun gronda cuntentientscha. Gl’ei prestaziuns che astgan semussar. Mo frestgamein vinavon sin quella via.
-l